নিয়মীয়া বাৰ্তা , ৰঙিয়া, ২৬ মাৰ্চঃ ৰঙিয়াত আছুৰ প্ৰতিবাদ। জনবহুল অঞ্চলত ৰে’ল বিভাগে কয়লাৰ ৰেক লোডিং-আনলোডিঙৰ কাম আৰম্ভ কৰাৰ বিৰুদ্ধে ৰঙিয়া আঞ্চলিক ছাত্র সন্থাৰ এই প্ৰতিবাদ। শণিবাৰে শতাধিক আছু কৰ্মীয়ে নতুনকৈ আৰম্ভ কৰা ৰঙিয়া ষ্টেচন ৰোডৰ কয়লা লোডিং-আনলোডিং স্থানৰ সমীপত সমবেত হৈ উত্তাল প্ৰতিবাদ সাব্যস্ত কৰে। প্ৰতিবাদকাৰীসকলে হস্পিতাল, স্কুল আদিৰ নিচেই কাষতে জনবহুল অঞ্চলত কয়লাৰ লোডিং-আনলোডিং কৰি জনস্বাস্থ্যৰ প্ৰতি ভাবুকি কঢ়িয়াই অনা কাৰ্যৰ বাবে ৰে’ল বিভাগৰ বিৰুদ্ধে ক্ষোভ উজাৰিছে।
বিশেষকৈ কয়লা কঢ়িয়াই নিয়া ট্ৰাকৰ বাবে ভয়াৱহ প্ৰদূষণৰ সৃষ্টি হোৱাৰ অভিযোগ কৰে। বিজ্ঞানসন্মতভাৱে জনসাধাৰণৰ অসুবিধা নোহোৱাকৈ কয়লা লোডিং-আনলোডিং কৰাৰ ব্যৱস্থা কৰিবলৈ আহ্বান জনায়। অতি শীঘ্ৰে কয়লাৰ লোডিং-আনলোডিঙৰ কাম স্থানান্তৰ কৰিবলৈ প্ৰতিবাদকাৰী সকলে দাবী জনায়।