নিয়মীয়া বাৰ্তা, ১৬ ডিচেম্বৰঃ বিটিচি দখলেৰে বিধানসভা নির্বাচনৰ প্রস্তুতি তুংগত কৰি তোলা ৰাজ্যিক বিজেপিৰ সৈতে এক গুৰুত্বপূর্ণ বৈঠকত অংশ ল’বলৈ ২৬ ডিচেম্বৰত গুৱাহাটীত উপস্থিত হ’ব কেন্দ্রীয় গৃহমন্ত্রী অমিত শ্বাহ৷ মুখ্যতঃ চৰকাৰী অনুষ্ঠানত অংশগ্রহণৰ বাবে দুদিনীয়া কার্যসূচীৰে অসমত উপস্থিত হ’ব কেন্দ্রীয় গৃহমন্ত্রীগৰাকী৷ ২৫ ডিচেম্বৰৰ নিশা গুৱাহাটীত উপস্থিত হৈ ৰাজ্যিক বিজেপিৰ নেতৃত্বৰ সৈতে ২০২১ চনৰ বিধানসভা নির্বাচনৰ প্রস্তুতি সন্দর্ভত এক আলোচনাত মিলিত হ’ব৷ লক্ষণীয়ভাৱে এই ভ্রমণৰ সময়তে বিজেপিৰ মিত্রদল অগপৰ নেতৃত্বৰ সৈতেও এক অনানুষ্ঠানিক বৈঠকত মিলিত হ’ব অমিত শ্বাহ৷ ৰাজ্যিক বিজেপিৰ এক সূত্রই প্রকাশ কৰা অনুসৰি অমিত শ্বাহে বিধানসভা নির্বাচনৰ আসন ভাগ–বাটোৱাৰাৰ ক্ষেত্রতো কিছু গুৰুত্বপূর্ণ আলোচনাত বহিব ৰাজ্যিক বিজেপি আৰু অগপৰ সৈতে৷
ইফালে, অমিত শ্বাহৰ ভ্রমণৰ আগে আগে কাইলৈ গুৱাহাটীত উপস্থিত হ’ব ৰাজ্যিক বিজেপিৰ প্রভাৰী বৈজয়ন্ত পাণ্ডা৷ কাইলৈ দিনৰ ১১ বজাত গুৱাহাটীত উপস্থিত হৈ প্রভাৰীগৰাকীয়ে দিনৰ ১২ বজাত হেঙেৰাবাৰীস্থিত ৰাজ্যিক বিজেপিৰ কার্যালয়ত বিষয়ববীয়াৰ সৈতে এক বৈঠকত মিলিত হ’ব৷ আনহাতে দুপৰীয়া ২ বজাত শ্রীমন্ত শংকৰদেৱ কলাক্ষেত্রত জিলা সভাপতি আৰু জিলা প্রভাৰীসকলৰ সৈতে আন এক বৈঠকত মিলিত হ’ব৷ বিয়লি ৪ বজাত দলৰ মর্চাৰ সভাপতি, সাধাৰণ সম্পাদক, বিভিন্ন চেলৰ আহ্বায়কসকলৰ সৈতে উক্ত স্থানতে আন এক বৈঠকত মিলিত হ’ব তেওঁ৷ সন্ধিয়া ৫ বজাত বৈজয়ন্ত পাণ্ডাই মুখপাত্র, পেনেলিষ্ট, মিডিয়া চেল আৰু আই টি চেলৰ কার্যকর্তাসকলৰ সৈতে বৈঠকত মিলিত হ’ব৷
আনহাতে নিশা ৮ বজাত ব্রহ্মপুত্র ৰাজ্যিক অতিথিশালাত মুখ্যমন্ত্রী সর্বানন্দ সোণোৱালৰ সৈতে বিধানসভা নির্বাচনৰ সন্দর্ভত আন এক বৈঠকত মিলিত হ’ব৷ মুখ্যতঃ এই বৈঠকতে আগন্তুক বিধানসভা নির্বাচনৰ সন্দর্ভত দলে গ্রহণ কৰা বিভিন্ন নীতি তথা ৰণকৌশল সম্পর্কে আলোচনা হ’ব৷ উল্লেখ্য যে অমিত শ্বাহৰ ভ্রমণৰ পূর্বে বৈজয়ন্ত পাণ্ডাই এই দুদিনীয়া ভ্রমণ সামৰি ৰাষ্ট্রীয় নেতৃত্বৰ ওচৰত এক প্রতিবেদন দাখিল কৰিব৷ উক্ত প্রতিবেদনৰ ওপৰত নির্ভৰ কৰিয়েই ৰাষ্ট্রীয় নেতৃত্বই বিধানসভা নির্বাচনক লক্ষ্য কৰি এলানি নির্দেশনা তথা ৰণকৌশল ৰাজ্যিক বিজেপিলৈ প্রেৰণ কৰাৰ সম্ভাৱনা আছে৷