নিয়মীয়া বাৰ্তা, ১ জুলাইঃ অসম গ্ৰামীণ বিকাশ বেংক আমচৈ শাখাত ১ জুলাইৰ আৰু এজন কর্মচাৰী হ্ৰাস পালে। বৰ্তমান শাখাটোত শাখা পৰিচালক আৰু এগৰাকী ৪র্থ বর্গৰ কর্মচাৰীহে স্থায়ী ভাৱে আছে । শাখাটোত সহায়ক হিচাপে কৰ্তব্য কৰি থকা প্রেম কুমাৰ পাটৰে ৩০ জুনত অৱসৰ গ্ৰহণ কৰাৰ লগে লগে অসম গ্ৰামীণ বিকাশ বেংক আমচৈ শাখাত বিষয়া কর্মচাৰীৰ সংখ্যা এনেকৈ হ্ৰাস পায়। শাখাটোৰ লগত প্রায় ১৬ হাজাৰ গ্রাহক প্রত্যক্ষভাবে জড়িত হৈ আছে। শাখাটোত বহুদিনৰ পৰাই বিষয়া কর্মচাৰীৰ অভাৱৰ বাবে গ্রাহক সকলে সময়মতে শাখাটোত আর্থিক লেনদেন কৰিব পৰা নাই। তথাপি বেঙ্কটোৰ উর্ধতন কৰ্তৃপক্ষই শাখাটোত বিষয়া কর্মচাৰীৰ সংখ্যা বৃদ্ধি কৰা নাই, বৰঞ্চ দিনক দিনে হ্ৰাসহে কৰি আছে। অসম গ্ৰামীণ বিকাশ বেংক আমচৈ শাখা আমচৈ অঞ্চলৰ গ্রাহক সকলৰ বেঙ্কটোৰ উর্ধতন কৰ্তৃপক্ষক আমচৈ শাখাত অতি সোণকালে বিষয়া কর্মচাৰীৰ সংখ্যা বৃদ্ধিৰ বাবে দাবী জনাইছে।