নিয়মীয়া বাৰ্তা ডিজিটেল, ৩১ জুলাইঃ হোজাই সাহিত্য সভাৰ কাৰ্যালয় সাহিত্যৰথী বেজবৰুৱা ভৱনত হোজাইৰ নবীন আৰু প্ৰবীণ অভিনেতা, শিল্পী আৰু নাট্যকৰ্মীসকলৰ উপস্থিতিত এখন সাধাৰণ সভা কালি অনুষ্ঠিত হয়। পদ্মকান্ত বৰাৰ সভাপতিত্বত অনুষ্ঠিত সভাত, অসম নাট্য সন্মিলনৰ সহ সম্পাদক সুৰজ কুমাৰ শইকীয়া, নগাঁও জিলা নাট্য সন্মিলনৰ সাধাৰণ সম্পাদক জিতুমনি মহন্ত, কামপীঠ মণ্ডলৰ সম্পাদক ভাস্কৰ কলিতা আৰু পুৰণিগুদাম শাখাৰ সম্পাদক ৰঞ্জন তামুলী প্ৰমুখ্যে অসম নাট্য সন্মিলনৰ নেতৃবৰ্গ উপস্থিত থাকে। পৰ্যালোচনাৰ অন্তত হোজাই সদৰ শাখা নাট্য সন্মিলনখন গঠনৰ প্ৰস্তাৱমৰ্মে পদ্মকান্ত বৰাক সভাপতি, ডাঃ শ্বামছুল হকক কাৰ্যকৰী সভাপতি, ডাঃ চাইদুল ইছলাম, দয়াল চন্দ্ৰ ক্ৰক উপ-সভাপতি, প্ৰশান্ত বৰকাকতিক সম্পাদক, আৰাধনা শৰ্মা আৰু কিশলয় দেৱগোস্বামীক সহকাৰী সম্পাদক, জিতু শৰ্মা আৰু ভাস্কৰজ্যোতি শইকীয়াক সাংগঠনিক সম্পাদক, বিমল নাথক কোষাধ্যক্ষ, প্ৰতাপ বৰুৱাক প্ৰচাৰ সম্পাদক, সৰ্বেশ্বৰ পাঠকক কাৰ্যালয় সম্পাদকৰ লগতে এঘাৰগৰাকীক সদস্যৰূপে লৈ এখন সাতাইশজনীয়া সমিতি গঠন কৰি দিয়ে। সভাই পাঁচজনীয়া উপদেষ্টা সমিতি এখনো মনোনীত কৰে। বহুদিনৰ বিৰতিৰ পাছত হোজাইত নাট্যাভিনয়ৰ এটি সুস্থ পৰিৱেশ উভতি আহিব বুলি হোজাইবাসী কলামোদী ৰাইজে আশা ব্যক্ত কৰিছে।
প্ৰেৰক কিশলয় দেৱগোস্বামী