নিয়মীয়া বাৰ্তা ২০ ফেব্ৰুৱাৰীঃ কুইপৰ দুই বিষয়া প্রণৱ কুমাৰ গগৈ আৰু ৰাম কুমাৰক শীঘ্রে মুক্তি দিবলৈ শুকুৰবাৰে আলফা (স্বাধীন)লৈ কাতৰ অনুৰোধ জনালে ৰাজ্য চৰকাৰৰ জ্যেষ্ঠ মন্ত্রী ড০ হিমন্ত বিশ্ব শর্মাই৷ উল্লেখ্য যে আলফাৰ দ্বাৰা অপহূত কুইপৰ এই দুই বিষয়াক সংগঠনটোৱে চৰম শাস্তি দিয়াৰ কথা ঘোষণা কৰিছে৷ আলফা আৰু কুইপৰ মাজত আলোচনা বিফল হোৱাৰ পাছত এই চৰম শাস্তিৰ কথা ঘোষণা কৰিছে বিদ্রোহী সংগঠনটোৱে৷
আলফাৰ এই ঘোষণাৰ পাছতেই মন্ত্রী ড০ হিমন্ত বিশ্ব শর্মাই সংবাদ মাধ্যমৰ আগত কয়– এই ঘটনা কোনো কাৰণতেই গ্রহণযোগ্য নহয়৷ সঞ্জয় ঘোষৰ মৃত্যুৰ পাছত, ধেমাজি ঘটনাৰ পাছত যি ধৰণে অসমীয়া জাতিয়ে ভাৰত অথবা বিশ্বৰ ওচৰত থিয় হ’ব পৰা নাছিল, আমাৰ অৱস্থা পুনৰ তেনেকুৱা হ’ব৷ আজি যদি নিৰপৰাধী প্রণৱ গগৈ আৰু ৰাম কুমাৰৰ কিবা এটা হয়, তেন্তে অসমবাসীৰ শিৰ একেবাৰে নত হৈ যাব৷ আমি অসমবাসী আজি এটা পর্যায়ত উপনীত হৈছোঁ৷ মানুহে ধেমাজিৰ কাণ্ড পাহৰিছে, সঞ্জয় ঘোষৰ মৃত্যুৰ ঘটনা পাহৰিছে৷ কিন্তু ইয়াৰ পাছত যদি পুনৰ তেনে এক ঘটনাৰ পুনৰাবৃত্তি হয়, তেতিয়াহ’লে অসম পুনৰ লজ্জানত হ’ব৷ আমাৰ জাতিটোক তালিবানী বুলি তুলনা কৰিব৷ গতিকে মই অত্যন্ত বিনম্রতাৰে আলফাক অনুৰোধ কৰিম যাতে নিৰপৰাধী ব্যক্তিকেইগৰাকীক তেওঁলোকে মুকলি কৰি দিয়ক৷ মই পৰেশ বৰুৱাকো বিনম্রতাৰে দুই হাতযোৰ কৰি অনুৰোধ কৰিম আপুনি দুয়োগৰাকী ব্যক্তিক তেওঁলোকৰ পৰিয়ালৰ ওচৰলৈ ওভতাই পঠিয়াওক৷ আমি কৃতজ্ঞ হৈ থাকিম৷