নিয়মীয়া বাৰ্তা, ১৩ জুলাইঃ দীর্ঘদিন ধৰি কৰ ফাঁকি দি অহা ফাঁচী বজাৰৰ এজন ব্যৱসায়ী অসম আৰক্ষীৰ অর্থনৈতিক অপৰাধ অনুসন্ধান সংস্থা (বি আই ই অ’)ৰ জালত পৰিছে৷ আৰক্ষীৰ জালত পৰা ব্যৱসায়ীগৰাকী হৈছে ফাঁচী বজাৰস্থিত মেছার্ছ এছ কে ছেলছৰ স্বত্বাধিকাৰী সুভাষ কুমাৰ সিং৷
ফটাশিল আমবাৰী নিৱাসী এই ব্যৱসায়ীগৰাকী জর্দা, পাণ মথলা, গুট্খা, মহ খেদা ধূপৰ ব্যৱসায়ৰ লগত জড়িত৷ কিন্তু ধৃত সুভাষ সিঙে বিগত দুবছৰ ধৰি বৃহৎ হাৰত কৰ ফাঁকি দি আহিছিল৷ গোপন সূত্রৰ পৰা এই তথ্য লাভ কৰি বি আই ই অ’ৰ কৰ শাখাৰ সহকাৰী আয়ুক্ত সত্যজিৎ ভূঞা আৰু কৰ অধীক্ষক মনোজ পাণ্ডেই ফাঁচী বজাৰৰ ব্যৱসায়িক প্রতিষ্ঠানত অভিযান চলাই সুভাষ সিঙৰ লেপটপ, ম’বাইল ফোনকে ধৰি বিভিন্ন ব্যৱসায়িক নথি–পত্র জব্দ কৰি আনে৷
আৰক্ষীৰ অনুসন্ধানত ওলাই পৰে যে এই ব্যৱসায়ীজনে বিগত দুবছৰত ফাঁকি দিয়া কৰৰ পৰিমাণ জৰিমনাসহ প্রায় ২২ কোটি টকা হ’ব৷ জি এছ টি আইন অনুসৰি কোনো ব্যক্তি ৫ কোটিতকৈ অধিক ধনৰ কৰ ফাঁকিৰ লগত জড়িত হ’লেই গ্রেপ্তাৰৰ সন্মুখীন হ’ব লাগিব৷ সুভাষ সিঙৰ জালিয়াতিৰ নিশ্চিত প্রমাণ লাভ কৰাৰ পাছতেই আৰক্ষীয়ে ব্যৱসায়ীজনক গ্রেপ্তাৰ কৰি কামৰূপ জিলা মুখ্য ন্যায়িক দণ্ডাধীশৰ আদালতত হাজিৰ কৰায়৷