নিয়মীয়া বাৰ্তা, ২ এপ্ৰিল : সমগ্ৰ ৰাজ্যৰ সমান্তৰালভাৱে শোণিতপুৰৰ বিভিন্ন স্থানত অব্যাহত আছে ৰঙালীক আদৰাৰ পৰ্ব। ঠায়ে ঠায়ে অনুষ্ঠিত হৈ আছে বিহু নাচ কৰ্মশালা। নদুৱাৰ বিধানসভা সমষ্টিৰ লোক্ৰাত লোক্ৰা বুঢ়াগাঁও আঞ্চলিক ৰঙালী বিহু মেলা সমিতিৰ উদ্যোগত বুঢ়াগাঁও মধ্য ইংৰাজী বিদ্যালয়ৰ প্ৰাংগণত অনুষ্ঠিত হৈ আছে বিহু নাচৰ কৰ্মশালা। কৰ্মশালাত চাৰিদুৱাৰৰ বিহু নৃত্য শিল্পী মিতালী শইকীয়া আৰু সংগীবৃন্দৰ নেতৃত্বত বিহু নাচৰ কৰ্মশালা অব্যাহত আছে। কৰ্মশালাত লোক্ৰা, বুঢ়াগাঁও, খৈলামাৰী ইত্যাদি বিভিন্ন অঞ্চলৰ সহস্ৰাধিক কণ কণ শিশু, যুৱতীয়ে অংশগ্ৰহণ কৰিছে। ঢোল, পেঁপা, গগণা, বিহু গীতৰ শব্দত মুখৰিত হৈ পৰিছে সমগ্ৰ লোক্ৰা অঞ্চলৰ পৰিৱেশ। একেদৰে বালিপৰাত সদৌ বালিপৰা ৰঙালী বিহু মেলা উদযাপন সমিতিৰ উদ্যোগত আৰু চাৰিদুৱাৰত বালিপৰা আঞ্চলিক আছুৰ উদ্যোগত অব্যাহত আছে বিহু নাচ আৰু ঢোল বাদনৰ কৰ্মশালা।
প্ৰেৰক প্ৰাঞ্জল বৰা