নিয়মীয়া বাৰ্তা ১৯ ডিচেম্বৰঃ সদ্যসমাপ্ত বিটিচি নির্বাচনত বিজেপিৰে বি পি এফৰ সম্পর্ক তিক্ততাপূর্ণ হৈ পৰে৷ আনকি নির্বাচনী ফলাফল অনুসৰি হাগ্রামা মহিলাৰী নেতৃত্বাধীন বি পি এফ দল একক বৃহত্তম দল হিচাপে পৰিগণিত হোৱাৰ পাছত দিছপুৰত থকা মিত্রতাৰ সূত্রে বিটিচিত চৰকাৰ গঠনৰ ক্ষেত্রত বিজেপিৰ পৰা সহায় বিচাৰে৷ কিন্তু বিজেপিয়ে বি পি এফক সমর্থন কৰাৰ পৰিৱর্তে ইউ পি পি এল আৰু জি এছ পিৰে নতুন মিত্রতাত আবদ্ধ হৈ বিটিচিত চৰকাৰ গঠন কৰে৷ বিটিচিক লৈ বিজেপি আৰু বি পি এফ দলৰ মাজত সম্পর্কত যতি পৰিছে যদিও এই মুহূর্তত চৰকাৰৰ পৰা ওলাই নহাৰ কঠোৰ সিদ্ধান্ত গ্রহণ কৰিছে বি পি এফে৷ ২০২১ চনৰ বিধানসভা নির্বাচন পর্যন্ত বি পি এফৰ তিনি মন্ত্রীয়ে পদত্যাগ নকৰে৷ মন্ত্রী হিচাপে তেওঁলোক থাকি যাব৷ বি পি এফৰ এক সূত্রই জানিবলৈ দিয়া মতে, ২০১৬ চনৰ বিধানসভা নির্বাচনত পাঁচ বছৰৰ বাবে বিজেপিৰ লগত তেওঁলোকৰ মিত্রতা হৈছিল৷ বি পি এফ, অগপ, গণ শক্তি, ৰাভা যৌথ মঞ্চ, তিৱা আদিৰ সহযোগত ২০১৬ চনত দিছপুৰত বিজেপি মিত্রজোঁটৰ চৰকাৰ হয়৷ সেইসূত্রে এক নির্দিষ্ট ফর্মূলা অনুসৰি বি পি এফৰ তিনি বিধায়কে মন্ত্রিত্ব লাভ কৰিছে৷ কাৰো অনুগ্রহত তেওঁলোকৰ তিনি বিধায়ক মন্ত্রী হোৱা নাই৷ এনে অৱস্থাত বিজেপিৰ লগত সংঘাত চলিলেও তেওঁলোকে মন্ত্রিত্ব এৰাৰ প্রসংগ নাহে৷ অৱশ্যে কার্যকাল অন্ত পৰাৰ পূর্বেই যদি বিজেপিয়ে মিত্রতাৰ নীতি ভংগ কৰি তেওঁলোকৰ তিনি মন্ত্রীক অপসাৰণ কৰে, বি পি এফে সেই সিদ্ধান্ত মানি ল’ব৷ কিন্তু স্বেচ্ছাই তিনি মন্ত্রীয়ে মন্ত্রিত্ব নেৰে৷ সূত্রটোৱে আৰু কয় যে ২০২১ চনৰ বিধানসভা নির্বাচনত কোনো পৰিস্থিতিতে বি পি এফে বিজেপিৰ সৈতে মিত্রতা নকৰে৷ বৰং বিটিচি নির্বাচনৰ ফলাফলৰ পাছতেই তেওঁলোকে সিদ্ধান্ত লৈছে– অহা বিধানসভা নির্বাচনত বি পি এফে ৰাজ্যত পৰৱর্তী চৰকাৰ গঠনত নির্ণায়ক ভূমিকা ল’ব পৰাকৈ নিজকে সম্পূর্ণৰূপে প্রস্তুত কৰিব৷ ইয়াৰ বাবে দলটোৱে যাৱতীয় ৰণনীতি প্রস্তুত কৰিছে৷ আনহাতে, বিটিচিৰ অধীনস্থ ১২টা বিধানসভা সমষ্টিক বাদ দি ৰাজ্যখনৰ ২৬টাৰ পৰা ২৮টা সমষ্টিত বড়ো ভোটাৰ আছে৷ অহা বিধানসভা নির্বাচনত সেইবোৰ সমষ্টিৰ ক্ষেত্রত তেওঁলোকে ৰাষ্ট্রীয় দলৰ পৰিৱর্তে জাতীয়তাবাদী–আঞ্চলিক্ দলৰ প্রার্থীক সমর্থন আগবঢ়াব৷ সূত্রটোৰ মতে, যোৱা বিধানসভা নির্বাচনৰ সময়ত সেইবোৰ সমষ্টিৰ বড়ো জনগোষ্ঠীৰ ভোট বিজেপি দলে লাভ কৰিছিল৷ তেওঁলোকৰে হোৱা মিত্রতাৰ সূত্রে সংশ্লিষ্ট সমষ্টিসমূহত বড়ো জনগোষ্ঠীৰ ভোট বিজেপিয়ে লাভ কৰিছিল৷ পূর্বতে কংগ্রেছৰ লগত থকা মিত্রতাৰ সময়তো সেই ভোট কংগ্রেছলৈ গৈছিল৷ এইবাৰ বিটিচি নির্বাচন আৰু বিটিচি চৰকাৰ গঠনৰ ক্ষেত্রত বিজেপিয়ে কৰা প্রতাৰণাৰ বাবেই বি পি এফে সেই ভোট বিজেপিৰ পৰিৱর্তে আন দল, মূলতঃ জাতীয়তাবাদী–আঞ্চলিক্ দলৰ প্রার্থীলৈ দিয়াৰ ব্যৱস্থা কৰিব৷ এক কথাত ক’ব লাগিলে ২০১৬ চনৰ বিধানসভা নির্বাচনত বদৰুদ্দিন আজমল নেতৃত্বাধীন এ আই ইউ ডি এফে যিদৰে কংগ্রেছৰ ক্ষতি কৰিছিল, এইবাৰ একেই ৰণনীতিৰে ২০২১ৰ বিধানসভা নির্বাচনত বিজেপিক ক্ষতি কৰাৰ পৰিকল্পনা গ্রহণ কৰিছে হাগ্রামা মহিলাৰীয়ে৷