নিয়মীয়া বাৰ্তা, ১৮ মেঃ কামৰূপ জিলাৰ বিজয়নগৰৰ মদনীয়া বাবুৰ দোকানৰূপে পৰিচিত চানন্দ ষ্টিল এণ্ড ছেনিটাৰী নামৰ হাৰ্ডৱেৰ দোকানখনৰ পৰা আজি দুপৰীয়া এ এছ ১৮ চি ৬০৫৫ নম্বৰৰ বকো চিকিৎসালয়ৰ এম্বুলেঞ্চ খনেৰে কাঠৰ সামগ্ৰী অবৈধভাবে কঢ়িয়াই লৈ গৈ থকা অৱস্থাত ছয়গাঁও আৰক্ষীয়ে জব্দ কৰে । জানিব পৰা মতে, এম্বুলেঞ্চ খনে বিজয়নগৰৰ পৰা গাড়ীখনৰ ভিতৰত চালকজনে কাঠৰ সামগ্ৰী ভৰাই অনা খবৰ ছয়গাঁও আৰক্ষীয়ে বিশেষ সূত্ৰে লাভ কৰে । সেই খবৰৰ ভিত্তিত ছয়গাঁও আৰক্ষীয়ে ৰাষ্ট্ৰীয় ঘাইপথত এম্বুলেঞ্চ ধৰাৰ পিছত জোলঙাৰ মেকুৰী ওলাই পৰে । লকডাউনৰ সময়চোৱাত এতিয়া জৰুৰীকালীন সেৱাত নিয়োজিত এম্বুলেঞ্চ সমূহ হৈ পৰিছে অবৈধ কামকাজৰ বাহকস্বৰূপ । উল্লেখ্য যে জৰুৰীকালীন ভাবে ৰাজ্যত চলি থকা এম্বুলেঞ্চ সমূহক অবৈধ কামকাজত চালক সকলে ব্যৱহাৰ কৰিবলৈ লোৱা ঘটনাই প্ৰতিক্ৰিয়াৰ সৃষ্টি কৰিছে ।