অসমৰ জনতাক চিমেণ্ট–ৰড লবীৰ কেঁকোৰা চেপা

নিয়মীয়া বাৰ্তা ১৬ নৱেম্বৰঃ ক’ভিডপীড়িত সর্বসাধাৰণৰ সন্মুখত সম্প্রতি ক্রমবর্ধমান আকাশলংঘী মূল্যবৃদ্ধি এক বিৰাট প্রত্যাহ্বান হৈ পৰিছে৷ বজাৰত প্রতিবিধ সামগ্রীৰ বর্ধিত মূল্যই মাধমাৰ শোধাইছে খাটিখোৱা জনসাধাৰণক৷ আনকি মূল্যবৃদ্ধিৰ হাতোৰাৰ পৰা বাদ পৰি যোৱা নাই নির্মাণ সামগ্রীও৷ নিয়ন্ত্রণহীন বজাৰৰ সুবিধা লৈ বণিয়া চক্রই বৃদ্ধি কৰিছে শিল, বালি, ইটা, ৰড, চিমেণ্ট আদি প্রতিবিধ নির্মাণ সামগ্রীৰ দাম৷ ফলত সপোনৰ ঘৰটো নির্মাণ কৰিবলৈ গৈ প্রতিজন লোকে এতিয়া থমকি ৰ’বলগীয়া হৈছে৷ অকল সেয়াই নহয়, সামগ্রীৰ অভাৱনীয় হাৰৰ মূল্যবৃদ্ধিয়ে সাংঘাতিক ধৰণে বিৰূপ প্রভাৱ পেলাইছে ৰাজ্যৰ নির্মাণ খণ্ডত৷ চৰকাৰী– বেচৰকাৰী নির্মাণকার্যত ব্যয় বৃদ্ধি পাইছে৷ প্রায় দুটা মাহৰ ব্যৱধানতে অসমৰ বজাৰত নির্মাণ সামগ্রীৰ মূল্যৰ তফাতে সকলোৰে চকু কপালত তুলিব৷ এই সময়ছোৱাত প্রতি মেট্রিকটন ৰডৰ দৰ ৭,৫০০ টকাৰ পৰা ৮,৫০০ টকা পর্যন্ত বৃদ্ধি হৈছে৷

সেইদৰে প্রতি কিউবিক মিটাৰ (চি এম) শিল–বালিৰ মূল্য প্রায় দুগুণ হৈছেগৈ৷ প্রায় দুমাহ পূর্বে এক চি এম বালি ক্রয় কৰা গ্রাহকে এতিয়া এই নির্মাণ সামগ্রীবিধৰ সমপৰিমাণত ৭০০ৰ পৰা ৯০০ টকা অধিক ভৰিবলগীয়া হৈছে৷ প্রতি চি এম শিলৰ ক্ষেত্রতো মূল্যবৃদ্ধি হৈছে ৫০০ৰ পৰা ৬০০ টকাকৈ৷ ২,৫০০ ইটাৰ ক্ষেত্রত প্রায় দুটা মাহৰ ব্যৱধানতে ৩,০০০ টকাৰ পৰা ৩,৫০০ টকা বৃদ্ধি পাইছে৷ ৰাজ্যৰ ভিন্ন প্রান্তত ইয়াতকৈও অধিক বাঢ়িছে উক্ত নির্মাণ সামগ্রীকেইবিধৰ মূল্য৷ নির্মাণ সামগ্রীৰ ভিতৰত আটাইতকৈ অধিক হাৰত ৰডৰ মূল্য বৃদ্ধি হৈছে৷ গুৱাহাটীৰ বজাৰত প্রায় দুমাহ পূর্বে প্রতি মেট্রিকটন ৰড ৭১,০০০ টকাৰ পৰা ৭২,০০০ টকাৰ ভিতৰত বিক্রী হৈছিল৷ কিন্তু আজিৰ তাৰিখত এই সামগ্রীবিধৰ ঊর্ধ্বমুখী মূল্য হৈছে ৭৮,৫০০ টকাৰ পৰা ৮০,৫০০ টকা পর্যন্ত৷ আনকি খুচুৰা বজাৰত প্রতি কিলোগ্রাম ৰড ৮৮ টকাৰ পৰা ৯০ টকা দৰতো বিক্রী হৈছে৷ জিন্দাল, শ্যাম, ছুপাৰ শক্তি আদি কোম্পানীসমূহে অভাৱনীয় হাৰত বৃদ্ধি কৰিছে ৰডৰ মূল্য৷ অৱশ্যে কলকাতাৰ দুর্গাপুৰ কোম্পানীৰ ৰডৰ মূল্য ইয়াতকৈ কিছু কম৷ আজিৰ তাৰিখত দুর্গাপুৰ কোম্পানীৰ প্রতি টন ৰডৰ গুৱাহাটীৰ বজাৰত মূল্য হৈছে ৬৯,০০০ টকাৰ পৰা ৭২,০০০ টকা৷ ৰডৰ সমান্তৰালভাৱে সময়ে সময়ে চিমেণ্ট কোম্পানীসমূহেও মূল্যবৃদ্ধি কৰি আহিছে৷ এক কথাত ক’বলৈ গ’লে চিমেণ্ট–ৰড লবীয়ে মূল্যবৃদ্ধি ঘটাই কেঁকোৰা চেপা দিছে এটা সপোনৰ ঘৰ সজাৰ পৰিকল্পনা কৰা অসমৰ জনতাক৷ চলিত বছৰটোত একাধিকবাৰ মূল্যবৃদ্ধি ঘটোৱা চিমেণ্ট কোম্পানীসমূহে যোৱা মাহৰ শেষ ভাগত পুনৰ নির্মাণ সামগ্রীবিধৰ দাম বঢ়াইছিল৷

তথ্য অনুসৰি সম্প্রতি প্রতি বেগ মেক্স ৪৪০ টকা, ডালমিয়া জি এছ পি ৪৭০ টকা, ডালমিয়া সাধাৰণ ৪৫০, ষ্টাৰ ৪৫০, অম্বুজা ৪৫০, ডুৰাগার্ড ৪৪০, অমৃত ৪৩০, এ চি চি ৪২০ আৰু জিন্দাল চিমেণ্ট ৪০০ টকাত গুৱাহাটীৰ বজাৰত বিক্রী হৈ আছে৷ প্রায় দুমাহ পূর্বে প্রতি চি এম বালিৰ মূল্য ১,১০০ টকাৰ পৰা ১,২০০ টকা আছিল যদিও সেয়া বৃদ্ধি হৈ আজি ১,৮০০ টকাৰ পৰা ২,১০০ টকা হৈছেগৈ৷ শিলৰ ক্ষেত্রত প্রতি চি এমত পূর্বে গ্রাহকে ক্রয় কৰিছিল ১,৯০০ টকাৰ পৰা ২,০০০ টকাৰ ভিতৰত৷ পিছে আজিৰ তাৰিখত এই দৰত বজাৰত শিল পাবলৈ নাই৷ সম্প্রতি প্রতি চি এম শিলৰ মূল্য হৈছে ২,৪০০ টকাৰ পৰা ২,৬০০ টকা৷ নির্মাণ সামগ্রীৰ ভিতৰত অন্যতম অপৰিহার্য ইটাৰো এই সময়ছোৱাত অভাৱনীয় হাৰত মূল্যবৃদ্ধি ঘটিছে৷ প্রায় দুটা মাহ পূর্বে গুৱাহাটীৰ বজাৰত ২,৫০০টা ইটা ২২,০০০–২৫,০০০ টকাত উপলব্ধ আছিল৷ পিছে এতিয়া ইয়াৰ মূল্যবৃদ্ধি ঘটি হৈছেগৈ ২৫,০০০ টকাৰ পৰা ২৮,৫০০ টকা৷ শিল, বালি, ইটা, ৰড আৰু চিমেণ্টৰ উপৰি এটা ঘৰৰ বাবে প্রয়োজনীয় গজাল, বল্টু, কব্জা আদিৰো মূল্য দিনক দিনে ঊর্ধ্বমুখী হৈ গৈ আছে৷

গুৱাহাটীৰ বজাৰৰ তথ্য অনুসৰি পি ভি চি পাইপ আৰু ইলেক্ট্রিক কেব্লৰ মূল্যবৃদ্ধি পাইছে ১৫ৰ পৰা ২০ শতাংশ পর্যন্ত৷ এনেদৰে সামগ্রীৰ মূল্যবৃদ্ধি ঘটাৰ ফলত নির্মাণ খণ্ডত বিৰূপ প্রভাৱ পৰাৰ পাছতো সংশ্লিষ্ট কর্তৃপক্ষই এইক্ষেত্রত কার্যকৰী পদক্ষেপ গ্রহণ নকৰাটো আশ্চর্যজনক৷ যোৱা ১ নৱেম্বৰত উদ্যোগ আৰু বাণিজ্য মন্ত্রী চন্দ্রমোহন পাটোৱাৰীয়ে একাংশ চিমেণ্ট আৰু ৰড কোম্পানীৰ প্রতিনিধিৰ সৈতে দিছপুৰত এক বৈঠকত মিলিত হৈছিল যদিও কার্যতঃ ইয়াৰ সুফল লাভ কৰা নাই নির্মাণ খণ্ডটোৱে৷ বৈঠকত চিমেণ্ট আৰু ৰড কোম্পানীসমূহক মন্ত্রী পাটোৱাৰীয়ে মূল্যবৃদ্ধি নঘটাবলৈ সকীয়াই দিছিল যদিও কার্যক্ষেত্রত সেয়া পৰিণত নহ’ল৷ মন্ত্রী পাটোৱাৰীয়ে স্পষ্টভাৱে উল্লেখ কৰিছিল যে চুবুৰীয়া ৰাজ্য মেঘালয় আৰু পশ্চিমবংগৰ তুলনাত কোনো কাৰণ নোহোৱাকৈ অসমত চিমেণ্টৰ মূল্য অধিক হ’ব নোৱাৰিব৷ কিন্তু পশ্চিমবংগত প্রতি বেগ চিমেণ্ট ২৬০ টকাৰ পৰা ৩০০ টকা দৰত বিক্রী হোৱাৰ বিপৰীতে অসমত ইয়াৰ গড় মূল্য হৈছে ৪৫০ টকা৷ ইন্ধনৰ মূল্যবৃদ্ধিৰ দোহাই দি চিমেণ্ট–ৰড লবীয়ে নির্মাণ সামগ্রী দুবিধৰ দাম বঢ়াই মুনাফা লুটি আহিছে৷ আনকি শেহতীয়াকৈ পেট্র’ল–ডিজেলত আৰোপিত আবকাৰী শুল্ক কেন্দ্রীয় চৰকাৰে আৰু মূল্য সংযোজিত কৰ ৰাজ্য চৰকাৰে ৰেহাই দিয়াৰ পাছতো অসমত চিমেণ্ট–ৰডৰ দৰ নকমিল৷ এনে অৱস্থাত সমগ্র বিষয়টোক উদ্যোগ আৰু বাণিজ্য বিভাগৰ লগতে সংশ্লিষ্ট কর্তৃপক্ষই কিদৰে গ্রহণ কৰে, তাৰ ওপৰত সকলোৰে দৃষ্টি নিবদ্ধ হৈ ৰৈছে৷