নিয়মীয়া বাৰ্তা, ১১ ছেপ্টেম্বৰঃ ক’ভিড পৰিস্থিতি সামান্য উন্নত হোৱা বাবে আন্তঃজিলা যাতায়াত মুকলি কৰি দিয়াৰ পাছতে একাংশ বাছ মালিকে বাছৰ ভাৰা দুগুণ আদায় কৰাক লৈ সৃষ্টি হৈছে তীব্র প্রতিক্রিয়া৷ বিষয়টো সন্দর্ভত ইতিমধ্যে ৰাজ্য চৰকাৰে বাছ মালিক সন্থাক ভাৰা বৃদ্ধি নকৰিবলৈ অনুৰোধ জনাইছে৷ কিন্তু এনে অনুৰোধৰ পাছতো দূৰণিবটীয়া বাছৰ ভাৰা বৃদ্ধি কৰিছে একাংশ বাছ মালিকে৷
শুকুৰবাৰে সাংবাদিকে মুখ্যমন্ত্রী ড০ হিমন্ত বিশ্ব শর্মাৰ দৃষ্টিগোচৰ কৰাত মুখ্যমন্ত্রীয়ে কয়– এতিয়া বাছৰ ভাৰা বৃদ্ধি কৰাটো উচিত নহয়৷ বাছৰ মালিকসকলক মই আহ্বান জনাম– কেইটামান দিন ধৈর্য ধৰক৷ সাধাৰণ লোকৰ অর্থনৈতিক অৱস্থা এতিয়া ভাল নহয়৷ ক’ভিড পৰিস্থিতিৰ সময়ত বন্ধ হৈ থকাত গোটেই লোকচান এতিয়া আদায় কৰাৰ বাবে নামি পৰাটো উচিত নহয়৷ কথাটো হ’ল বাছ মালিক–কর্মচাৰীসক অসমীয়া, এনফ’চমেণ্ট বিষয়া–কর্মচাৰীসক অসমীয়া৷ গতিকে আমি নিজে নিজকে ঠিক কৰিব লাগিব৷ ‘অ’ মোৰ আপোনাৰ দেশ’ গাওঁ আমি৷ এইখন সকলোৰে দেশ৷ প্রথম পর্যায়ত পৰিবহণ বিভাগৰ বিষয়া অথবা এনফ’চমেণ্ট অফিচাৰ যোৱাটো আমি বিচৰা নাই৷ প্রথমতে আমি আবেদন, প্রণাম, অনুৰোধ কৰিছোঁ৷ কিন্তু নামানিলে চৰকাৰ আছে৷ এই চৰকাৰখনে প্রতিটো ক্ষেত্রত কিমান শক্তিশালী পদক্ষেপ ল’ব পাৰে, সকলোৱে প্রত্যক্ষ কৰিছে৷ প্রথম পর্যায়ত আমি লাঠী লৈ থিয় হ’ব বিচৰা নাই৷ নমস্কাৰ–প্রণাম জনাই আমি অনুৰোধ কৰিছোঁ৷ অন্যথা চৰকাৰ কঠোৰ হ’ব৷
ইফালে দুর্গাপূজা অনুষ্ঠিত কৰাক লৈও মুখ্যমন্ত্রীয়ে কয় যে দুর্গাপূজাৰ বাবে স্বাস্থ্য বিভাগে নতুন এছ অ’ পি জাৰি কৰিব৷ এইবাৰ দুর্গাপূজা হ’ব৷ কিন্তু আমি সাৱধানতাৰে ক’ভিড বিধি মানিহে পূজা অনুষ্ঠিত কৰিব লাগিব৷ পূজা চোৱাৰ পূর্বে প্রথম পালি ভেকচিন সকলোৱে ল’বই লাগিব৷ বেমাৰটো কমা বুলি ধাৰণা কৰি মানুহে দ্বিতীয় পালি ভেকচিন নোলোৱা হ’ল৷ আমাৰ অনুৰোধ– যেনে–তেনে ভেকচিনকেইটা লওক৷ ৰাজ্যত এতিয়া পর্যাপ্ত পৰিমাণৰ ভেকচিন আছে৷