নিয়মীয়া বাৰ্তা, ১৫ জুনঃ ভাৰতৰ স্বাধীনতা আন্দোলনৰ শ্বহীদ কুশল কোঁৱৰৰ আজি ৭৭সংখ্যক মৃত্যু দিৱস । এই উপলক্ষে আজি নেহৰু পাৰ্কত অনুষ্ঠিত শ্ৰদ্ধাঞ্জলি অনুষ্ঠানত শ্বহীদগৰাকীক সোঁৱৰণ কৰে মুখ্যমন্ত্ৰী সৰ্বানন্দ সোণোৱালে।
অনুষ্ঠানত মুখ্যমন্ত্ৰীগৰাকীয়ে কয়- ‘শ্বহীদ কুশল কোঁৱৰ এক আদৰ্শ। এনে আদৰ্শকে সাৰোগত কৰি আমি সকলোৱে দেশৰ বাবে নিষ্ঠাসহকাৰে তথা ভাতৃত্ববোধেৰে কৰ্ম কৰি দেশক আগুৱাই লৈ যাব লাগিব।’
ৰাজ্যপাল প্ৰফেছৰ জগদীশ মুখীয়েও টুইটযোগে শ্বহীদগৰাকীক সোঁৱৰণ কৰে। ‘স্বাধীনতা সংগ্ৰামৰ মহান শ্বহীদ কুশল কোঁৱৰলৈ স্মৃতি দিৱসৰ গভীৰ শ্ৰদ্ধাঞ্জলি নিবেদিছো।’ -তেওঁ টুইটযোগে এইদৰে লিখে।
উল্লেখ্য ভাৰতৰ স্বাধীনতা আন্দোলনৰ বাবে ১৯৪৩ চনত প্ৰাণাহুতি দিয়া বীৰ শ্বহীদগৰাকীৰ জন্ম হৈছিল গোলাঘাটৰ সৰুপথাৰত ১৯০৫ চনত।