নিয়মীয়া বাৰ্তা, ৪ মাৰ্চ: কামৰূপ জিলাৰ বকো সমষ্টিৰ সোণতলী আৰক্ষী চকীৰ অন্তৰ্গত জাওকাটা গাঁৱত বৃহস্পতিবাৰে এক ভয়ংকৰ অগ্নিকাণ্ডৰ ফলত জীৱন্তে অগ্নিদগ্ধ হৈ কৰুণ মৃত্যুক সাবটি লোৱা মকবুল হুছেইনৰ পৰিয়ালৰ কাষত আজি থিয় দিয়ে অৱসৰপ্ৰাপ্ত বন সংমণ্ডল বিষয়া তথা সমাজসেৱক ভৱেশ দাস ৷ উল্লেখ্য যে পেৰালাইচিচ্ ৰোগত আক্ৰান্ত হৈ ঘৰৰ বিছনাত শুই থকা অৱস্থাতে অগ্নিদগ্ধ হোৱা মকবুল হুছেইনৰ চাৰিটা গৃহও অগ্নিকাণ্ডটোত সম্পূৰ্ণৰূপে ভস্মীভূত হয় । এনে এক দুৰ্যোগপূৰ্ণ পৰিস্থিতিত অৱসৰপ্ৰাপ্ত বন বিষয়াগৰাকীয়ে মকবুল হুছেইনৰ ভস্মীভূত বাসগৃহত উপস্থিত হৈ শোকসন্তপ্ত পৰিয়ালৰ লোকক গভীৰ সমবেদনা জ্ঞাপন কৰাৰ লগতে ক্ষয়- ক্ষতিৰ বুজ লয় ৷ লগতে পৰিয়ালৰ লোকক সাময়িক সকাহ দিয়াৰ উদ্দেশ্যে কিছু আৰ্থিক সাহাৰ্য আগবঢ়ায় ৷ ইয়াৰ উপৰি অগ্নিকাণ্ডৰ সময়ছোৱাত মৃত মকবুল হুছেইনক উদ্ধাৰ কৰিবলৈ যাওঁতে অগ্নিদগ্ধ হৈ গুৰুতৰভাৱে আঘাতপ্ৰাপ্ত হোৱা চামচুল হক নামৰ লোকজনকো উন্নত চিকিৎসাৰ বাবে আৰ্থিক সাহাৰ্য প্ৰদান কৰি এক মহানুভৱতাৰ পৰিচয় দাঙি ধৰে ৷ ইপিনে, মৃত মকবুল হুছেইনৰ মৰণোত্তৰ পৰীক্ষাৰ অন্তত আজি বহু গুণমুগ্ধ লোকৰ উপস্থিতিত তেওঁৰ জানাজা সম্পন্ন কৰা হয় ৷
প্ৰেৰক কামাৰুজ জামান