নিয়মীয়া বাৰ্তা, ১১ মেঃ বঙাইগাঁও জিলাৰ যােগীঘােপা থানাৰ অন্তৰ্গত কাবাইটাৰীত ১৭ নং ৰাষ্ট্ৰীয় ঘাইপথত আজি এক পথ দুৰ্ঘটনাক কেন্দ্ৰ কৰি এক উত্তপ্ত পৰিস্থিতিৰ সৃষ্টি হয় । এখন তীব্রবেগী বাছে এখন টেম্পোত খুন্দা মাৰাত টেম্পখনৰ চালকসহ তিনিজন আৰোহী গুৰুতৰভাৱে আহত হয় । আহতকেইজন বৰথুৰীৰ মোস্তাফা আলী, বাবুল দাস, আৰু বিচিত্ৰ দাস । আহত টেম্প চালক মোস্তাফা আলীৰ অৱস্থা অতি সংকটজনক বুলি জানিব পৰা গৈছে । আহত আটাইকেইজনক উন্নত চিকিৎসাৰ বাবে বঙাইগাও অসামৰিক চিকিৎসালয়ত ভৰ্তি কৰোৱা হয় । ঘটনাৰ বিৱৰণীমতে ধুবুৰী অভিমুখে গৈ থকা এ এছ -০১ এম চি -৭৫৮৬ নম্বৰৰ তীব্ৰবেগী বাছখনে নিয়ন্ত্ৰণ হেৰুৱাই একে দিশতে গৈ থকা এছ -১৯ ছি ৭৪০৬ নম্বৰৰ টেম্পোখনক পিছফালৰ পৰা খুন্দা মাৰে । বাছখনে টেম্পোখনক কিছুদুৰ চোঁচৰাই নিয়াত টেম্পোখন সমুখত পথৰ কাষত ৰখাই থোৱা এখন ট্রাকত গৈ খুন্দা মাৰে । ফলত বাছ আৰু ট্ৰাকৰ চেপাত পৰে । লগে লগে স্থানীয় লোকে যথেষ্ট কষ্টৰে টেম্পচালক তথা আৰোহীকেইজনক উদ্ধাৰ কৰি চিকিৎসালয়লৈ প্ৰেৰণ কৰে । দুৰ্ঘটনাক কেন্দ্ৰ কৰি ঘটনাস্থলীত কিছু উত্তপ্ত পৰিস্থিতিৰ সৃষ্টি হয় যদিও পিচমুহুৰ্ততে তাত যােগীঘােপা আৰক্ষী উপস্থিত হৈ পৰিস্থিতি নিয়ন্ত্ৰণ কৰে ।
প্ৰেৰক টিংকু চন্দ্ৰ দাস