নিয়মীয়া বাৰ্তা, ১৩ মাৰ্চ : ডিব্ৰুগড় লোকসভা আসনৰ বিজেপি প্ৰাৰ্থী সৰ্বানন্দ সোণোৱালক আজি তিনিচুকীয়াত উষ্ম আদৰণি জনোৱা হয়। তিনিচুকীয়াত উপস্থিত হোৱাৰ পিছত সৰ্বানন্দ সোণোৱালক তিনিচুকীয়া বাইপাছ পথৰ পৰা তিনিচুকীয়া টি ডি এ সাংস্কৃতিক কেন্দ্ৰলৈ তেওঁৰ গুণমুগ্ধ শ শ জনতা যুৱকে বাইক ৰেলীৰে আদৰি আনে। টিডিএ সাংস্কৃতিক কেন্দ্ৰত উপস্থিত হোৱাৰ পাছত সৰ্বানন্দ সোণোৱালক তিনিচুকীয়াৰ বিধায়ক তথা ৰাজ্যিক কেবিনেট মন্ত্ৰী সঞ্জয় কিষাণৰ লগতে বিজেপিৰ তিনিচুকীয়া জিলা সমিতি, মহিলা আৰু যুৱ মৰ্চা, বিভিন্ন মণ্ডল সমিতিয়ে সম্বৰ্ধনা জনায়। এই অনুষ্ঠানত ভাষণ প্ৰদান কৰি সৰ্বানন্দ সোণোৱালে কয় যে বিজেপি দলে তেওঁক ডিব্ৰুগড় আসনৰ বাবে মনোনীত কৰা দলটোক ধন্যবাদ জ্ঞাপন কৰে। তেওঁৰ এই যাত্ৰাত তিনিচুকীয়া জিলাবাসীৰ মৰম আৰু আশীৰ্বাদ সদায় লাভ কৰিব বুলি আশা প্ৰকাশ কৰে। তিনিচুকীয়া জিলা অগপৰ কাৰ্যালয়তো সৰ্বানন্দ সোণোৱালক আদৰণি জনোৱা হয়। এই উপলক্ষে তিনিচুকীয়া জিলা অগপৰ কাৰ্যালয়ত আয়োজিত সভাত অগপৰ জিলা সভাপতি প্ৰবীণ দত্ত, কেন্দ্ৰীয় উপ-সভাপতি দিগন্ত শইকীয়া, কেন্দ্ৰীয় সম্পাদক স্বপ্ন মজুমদাৰৰ লগতে জিলা আৰু আঞ্চলিক পৰ্যায়ৰ বৃহৎসংখ্যক সদস্য/সদস্যা উপস্থিত থাকে। অনুষ্ঠানত ভাষণ প্ৰদান কৰি অগপৰ জিলা সভাপতি প্ৰবীণ দত্তই কয় যে মিত্ৰদলৰ প্ৰাৰ্থী সৰ্বানন্দ সোণোৱালৰ বিজয় নিশ্চিত কৰিবলৈ প্ৰতিজন অগপ কৰ্মীয়ে নেৰানেপেৰা চেষ্টা অব্যাহত ৰাখিব। বৈঠকত সৰ্বানন্দ সোণোৱালে মিত্ৰ দল অগপৰ সম্পূৰ্ণ সমৰ্থন লাভ কৰিব বুলি আশা প্ৰকাশ কৰে।
প্ৰেৰক সুৰজ দাস