নিয়মীয়া, ৭ ফেব্ৰুৱাৰী:- তিনিচুকীয়া আৰক্ষীৰ প্ৰতিটো দিনতেই অব্যাহত আছে মাৰাত্মক ড্ৰাগছৰ বিৰুদ্ধে অভিযান। আজি তিনিচুকীয়া সদৰ আৰক্ষী থানাৰ ভাৰপ্ৰাপ্ত আৰক্ষী বিষয়া পৰাগজ্যোতি বুঢ়াগোহাঁইৰ নেতৃত্বত চহৰ পৰিদৰ্শক ভাস্কৰ ৰাজবৰুৱাৰ সহযোগত আৰক্ষী এটা দলে বিশেষ খৱৰৰ ভিত্তিত অভিযান চলাই চান্দমাৰী বাইপাছত পথত ড্ৰাগছসহ এজন যুৱকক আটক কৰে ৷ আটকাধীন যুৱকজনক বাৰেকুৰি আৰক্ষী থানাৰ অন্তৰ্গত দিচাওজান গাঁৱৰ বলিন চেতিয়াৰ পুত্ৰ ৰিতুপৰ্ণ চেতিয়া ৷ ৰিতুপৰ্ণ চেতিয়াৰ পৰা আৰক্ষীয়ে ৪.২ গ্ৰাম সন্দেহজনক হিৰ’ইনসহ এটা মোবাইল আৰু এখন হিৰ’ গ্লেমাৰ মটৰচাইকেল জব্দ কৰিবলৈ সক্ষম হয়। পৰৱৰ্তী সময়ত তিনিচুকীয়া আৰক্ষীয়ে আটকাধীন যুবকজনক আটক কৰি সদৰ আৰক্ষী থানালৈ লৈ যোৱাৰ লগতে তদন্ত অব্যাহত ৰাখিছে আৰক্ষীয়ে ৷
উল্লেখযোগ্য যে, ড্ৰাগছসহ আটকাধীন যুৱকজন ইয়াৰ পূৰ্বেও ড্ৰাগছসহ তিনিচুকীয়া আৰক্ষীয়ে আটক কৰি কাৰাগাৰলৈ প্ৰেৰণ কৰিছিল ৷ কাৰাগাৰৰ পৰা উলাই অহাৰ কিছুদিনৰ পাছতে আজি পুনৰ ড্ৰাগছসহ আৰক্ষীয়ে আটক কৰা ঘটনাই স্থানীয় ৰাইজৰ মাজত চাঞ্চল্যই বিৰাজ কৰিছে ৷
প্ৰেৰক:-
বিবেক বড়া