নিয়মীয়া বাৰ্তা, ২০ জুনঃ আজি ধুবুৰী চহৰৰ পাৰ্শ্বৱৰ্তী ছাগলচৰা প্ৰথম খণ্ড গাঁৱত আৰক্ষীৰ এক ড্ৰাগছবিৰোধী অভিযানত বৃহৎ পৰিমাণৰ ড্ৰাগছসহ অজন ড্ৰাগছ সৰবৰাহকাৰী কৰায়ত্ত হোৱা বুলি জানিব পৰা গৈছে। ঘটনা সন্দৰ্ভত জানিব পৰা মতে, গোপন তথ্যৰ ভিত্তিত আজি ধুবুৰী আৰক্ষীৰ এটি দলে ছাগলচৰা প্ৰথম খণ্ড গাঁৱৰ আমজাদ হুছেইন নামৰ ব্যক্তিজৰ গৃহত এক তালাচী অভিযান চলাইছিল। উক্ত অভিযানত হুছেইনৰ গৃহৰ পৰা ২০৫টা নিচাজাতীয় টেৱলেট আৰু ব্ৰাউন ছুগাৰৰ ৯টা সৰু বটল উদ্ধাৰ কৰে আৰক্ষীয়ে। আৰক্ষীয়ে আমজাদ হুছেইনক কৰায়ত্ত কৰি জেৰা চলাই থকা বুলি জানিব পৰা গৈছে।
প্ৰেৰক অমিতাভ চক্ৰৱৰ্তী