নিয়মীয়া বাৰ্তা, ২৮ জুলাইঃ সীমান্তত মিজোৱে আগ্রাসন চলাই অসম আৰক্ষীৰ ৫জনকৈ জোৱানক গুলীয়াই নিহত কৰাৰ প্রতিবাদত আজি উত্তাল হৈ পৰিল হাইলাকান্দি৷ মিজোৰামৰ বর্বৰ কাণ্ডৰ বিৰুদ্ধে ৬নং ৰাষ্ট্রীয় ঘাইপথ অৱৰোধ কৰি স্থানীয় ৰাইজে চুবুৰীয়া ৰাজ্যখনৰ বিৰুদ্ধে প্রতিবাদ সাব্যস্ত কৰে৷
উল্লেখ্য যে কাছাৰ জিলাৰ লাইলাপুৰত মিজোৰাম আৰক্ষী আৰু একাংশ স্থানীয় মিজো লোকে অসম আৰক্ষীৰ ওপৰত আক্রমণ চলোৱাৰ লগতে ৫জনকৈ জোৱানক গুলীয়াই নিহত কৰি এক উত্তেজনাময় পৰিৱেশ সৃষ্টি কৰে৷ মিজোৰামৰ এই কাণ্ডৰ প্রতিবাদতে মঙলবাৰে হাইলাকান্দি জিলাৰ কৃষ্ণপুৰ এলেকাত প্রতিবাদী ৰাইজে ৰাষ্ট্রীয় ঘাইপথ অৱৰোধ কৰে৷ সীমান্তত মিজো আৰক্ষীৰ গুলীত নিহত হোৱা ছামছুজামান বৰভূঞাৰ বাসগৃহৰ সমুখত ৰাষ্ট্রীয় ঘাইপথত অৱস্থান কৰি মিজোৰামৰ ভৈৰৱীলৈ যোৱা সকলো যান–বাহন আবদ্ধ কৰি মিজোৰামৰ বিৰুদ্ধে অর্থনৈতিক অৱৰোধ গঢ়ি তোলে৷
প্রতিবাদকাৰীসকলে মিজোৰামৰ বিৰুদ্ধে অসম চৰকাৰক ব্যৱস্থা গ্রহণৰ দাবী তোলাৰ লগতে আগন্তুক দিনত মিজোৰামলৈ খাদ্যসামগ্রী কঢ়িয়াই নিয়া ৰে’ল যোগাযোগো বন্ধ কৰি দিয়াৰ হুংকাৰ দিয়ে৷
ইফালে, মঙলবাৰে হাইলাকান্দি জিলাৰ মহম্মদপুৰ ষ্টেচনত ৰে’লপথ বিচ্ছিন্ন কৰি প্রতিবাদ সাব্যস্ত কৰে একাংশ লোকে৷ এই ৰে’লপথেৰে মিজোৰামলৈ খাদ্য সামগ্রী প্রেৰণ কৰা হয়৷ জিলাখনৰ আন কেইবাঠাইতো মিজোৰামৰ বর্বৰোচিত আক্রমণৰ প্রতিবাদত ধর্ণা দি অৱস্থান কৰে বহু লোকে৷ মিজোৱে কালি চলোৱা আক্রমণৰ পিছত সৃষ্টি হোৱা অগ্ণিগর্ভ পৰিস্থিতিৰ মাজতে মঙলবাৰে কাছাৰৰ কাবুগঞ্জ আৰু ধলাইৰ ৫৪নং ৰাষ্ট্রীয় ঘাইপথ অৱৰোধ কৰে বিভিন্ন দল–সংগঠনে৷ শিলচৰ জিলা কংগ্রেছ কমিটীয়ে শ্বহীদ ক্ষুধিৰাম মূর্তিৰ তলত মহিলা কংগ্রেছৰ ৰাষ্ট্রীয় সভাপতি সুস্মিতা দেৱৰ নেতৃত্বত প্রতিবাদ সাব্যস্ত কৰে৷