নিয়মীয়া বাৰ্তা, ২৯ জুনঃ আজি পবিত্ৰ ঈদৰ দিনটোতে নগৰবেৰাৰ কল্যাণপুৰত দুই পক্ষৰ মাজত সংঘটিত হয় ভয়ানক মাৰপিট। নিচাসক্ত দুই বাইক চালকৰ মাজত তুমুল প্ৰতিযোগিতা হয় আৰু অত্যধিক হৰ্ণ বজোৱাৰ পাছতো এখনে আনখনক বাট এৰি নিদিয়াৰ বাবেই পাছলৈ দুই পক্ষৰ মাজত সংঘটিত হয় কুৰুক্ষেত্ৰ, উভয় পক্ষৰ তিনিজনকৈ যুৱক আহত হয় মাৰপিটৰ ফলত। জানিব পৰা মতে মাৰপিটত লিপ্ত হোৱা যুৱক কেইজন নিচাসক্ত আছিল আৰু নিচাৰ ৰাগিত হিতাহিত জ্ঞান হেৰুৱাই দুয়ো পক্ষৰ মাজত সংঘটিত হয় তুমুল সংঘৰ্ষ। মাৰপিটৰ ফলত পৰিস্থিতি উত্তপ্ত হৈ পৰে আৰু ঘটনাস্থলীত বহু মানুহৰ সমাগম ঘটে। অৱশেষত খৱৰ পাই ঘটনাস্থলীত উপস্থিত হয় নগৰবেৰা আৰক্ষীৰ এটা দল। আৰক্ষীৰ বাহনৰ উপৰ্যুপৰি বজোৱা চাইৰেণৰ শব্দ পাই ছত্ৰভংগ দিয়ে ঘটনাস্থলীত সমাগম ঘটা ৰাইজ। ইতিমধ্যে উক্ত মাৰপিটত গুৰুতৰভাবে আহত ক্ৰমে বিদ্যানগৰৰ আব্দুল্লা মণ্ডল, আব্দুল মান্নান মণ্ডল আৰু কল্যাণপুৰৰ ইমদাদুল হক নামৰ তিনি যুৱকক আৰক্ষীয়ে থানালৈ নিয়ে আৰু পাছলৈ তিনিওৰে চিকিৎসাৰ দিহা কৰে আৰক্ষীয়ে। পবিত্ৰ ঈদৰ দিনাই সংঘটিত এনে মাৰপিটৰ কাণ্ডক কেন্দ্ৰ কৰি চাঞ্চল্য বিয়পে সমগ্ৰ কল্যাণপুৰ অঞ্চলত।
প্ৰেৰক সঞ্জীৱ কুমাৰ দাস