নিয়মীয়া বাৰ্তা ৩০ জুনঃ বিতর্কিত ব্যৱসায়ী অজিত দাসৰ অপহৰণ কাণ্ডৰ সৈতে জডিত আৰক্ষী কনিষ্টবল ৰাজাবাবু সিঙক লগত লৈ যোৱানিশা ঘগুৱা পাহাৰত পুনৰ ক্রাইম ব্রাঞ্চে অভিযান চলায়৷ উল্লেখ্য যে দেওবাৰে পুৱতিনিশা গুৱাহাটীস্থিত ক্রাইম ব্রাঞ্চে ঘগুৱা পাহাৰৰ অতিশয় দুর্গম এলেকাত অভিযান চলাই আৰক্ষী কনিষ্টবল সূৰুয পাতৰ, হোমগার্ড জিতেন বাইলুঙৰ লগতে উমেশ দাস নাম এজন কম্পাউণ্ডাৰক গ্রেপ্তাৰ কৰিছিল৷ লগতে উদ্ধাৰ কৰিছিল অপহূত ব্যৱসায়ী অজিত দাসক৷
মঙলবাৰে পুৱতিনিশা প্রায় ২ বজাত অভিযুক্ত আৰক্ষী কনিষ্টবল ৰাজাবাবু সিঙক লৈ ঘগুৱা পাহাৰত পুনৰ ক্রাইম ব্রাঞ্চে অভিযান চলাওঁতেই পলাবলৈ চেষ্টা কৰোঁতে আৰক্ষীৰ গুলীত আহত হয় ৰাজাবাবু সিং৷ জানিব পৰা মতে, আহত ৰাজাবাবু সিঙক নিশাই মৰিগাঁও অসামৰিক চিকিৎসালয়লৈ নি প্রাথমিক চিকিৎসা কৰাৰ পিছতে গুৱাহাটীলৈ লৈ যোৱা হয়৷
উল্লেখ্য যে মহানগৰ আৰক্ষীৰ অপৰাধ অনুসন্ধান শাখাই অতি সংগোপনে নিশা ঘগুৱা অঞ্চলত অভিযান চলাইছিল৷ যাৰ বাবে স্থানীয় লোক এই সন্দর্ভত একো অৱগত নহয়৷ আনহাতে ঘগুৱা ঘুলিগাঁৱৰ সত্য বৰদলৈ আৰু সঞ্জু বৰদলৈ নামৰ দুজন যুৱকক অপহৰণকাৰীকেইজন আহাৰ যোগান ধৰা বাবে আৰক্ষীয়ে আটক কৰি সোধা–পোছা অব্যাহত ৰাখিছে৷ তদুপৰি এই চাঞ্চল্যকৰ অপহৰণ কার্যত ব্যৱহাৰ কৰা এ এছ–০১ ই এফ–৪৪৮০ নম্বৰৰ এখন বাহন আৰক্ষীয়ে জব্দ কৰে৷
ইপিনে ব্যৱসায়ী অজিত দাস নিষিদ্ধ ড্রাগ্ছৰ ব্যৱসায়ত জড়িত থকাৰ অভিযোগ উত্থাপন হৈছে যদিও আৰক্ষীয়ে এই সন্দর্ভত মুখ খোলা নাই৷ অৱশ্যে তদন্তৰ পিছত সকলো তথ্য পোহৰলৈ আহিব বুলি কামৰূপ মহানগৰ জিলাৰ আৰক্ষী আয়ুক্ত মুন্নাপ্রসাদ গুপ্তাই জানিবলৈ দিছে৷
ইপিনে পলাশবাৰী আৰক্ষীয়ে আজিৰ বিতর্কিত ব্যৱসায়ী অজিত দাসক ড্রাগছ সৰবৰাহ কার্যত জড়িত থকাৰ অভিযোগত গ্রেপ্তাৰ কৰে৷ পলাশবাৰী থানাত এনডিপিএছ এক্টৰ ২১ বি/২৯ ধাৰাত ৪০৫/২১ নম্বৰত ৰুজু হোৱা গোচৰৰ ভিত্তিত মঙলবাৰে আৰক্ষীয়ে ব্যৱসায়ী দাসক গ্রেপ্তাৰ কৰে৷ নাটকীয় অপহৰণ কাণ্ডৰ মুখ্য ভূমিকা গ্রহণ কৰা ব্যৱসায়ী অজিত দাসক আৰক্ষীয়ে গ্রেপ্তাৰ কৰি আদালতত হাজিৰ কৰাত কামৰূপ জিলা ন্যায়িক দণ্ডাধীশৰ আদালতে তেওঁক দুদিনৰ বাবে আৰক্ষীৰ জিম্মালৈ প্রেৰণ কৰে৷ সম্প্রতি পলাশবাৰী আৰক্ষীয়ে ড্রাগছ সৰবৰাহত অভিযুক্ত ব্যৱসায়ী দাসক মাৰাথন জেৰা অব্যাহত ৰাখিছে আৰু এই সন্দর্ভত পৰৱর্তী সময়ত অধিক তথ্য পোহৰলৈ অহাৰ সম্ভাৱনা আছে বুলি পলাশবাৰী আৰক্ষীৰ এক সূত্রই জানিবলৈ দিছে৷