নিয়মীয়া বাৰ্তা, ২ এপ্ৰিলঃ বজালী জিলা যোগ সমিতিৰ উদ্যোগত ছাত্ৰ-ছাত্ৰী তথা সাধাৰণ ৰাইজৰ উপকৃত হোৱাকৈ ৩০ মাৰ্চত মেক্সকেয়াৰ ডায়েগনষ্টিক আৰু মাল্টি স্পেচিয়েলিটি চেন্টাৰৰ জৰিয়তে এটি বিনামূলীয়া স্বাস্থ্য পৰীক্ষা শিবিৰ অনুষ্ঠিত হয়৷ পাঠশালাৰ হৰিমন্দিৰ প্ৰাংগণত অনুষ্ঠিত এই চিকিৎসা শিবিৰটোত অভিজ্ঞ চিকিৎসকৰ এটি দলে প্ৰায় ৮০ গৰাকীৰো অধিক ব্যক্তিক বিনামূলীয়া চিকিৎসা প্ৰদান কৰে। বজালী জিলা যোগ সমিতিৰ উপদেষ্টা জ্যোতিষ শৰ্মা আৰু কোষাধ্যক্ষ সন্তোষ শৰ্মাৰ পৃষ্ঠপোষকতাত অনুষ্ঠিত আৰু মেক্সকেয়াৰ ডায়েগনষ্টিক চেন্টাৰৰ দ্বাৰা সম্পাদিত এই বিনামূলীয়া স্বাস্থ্য পৰীক্ষা শিবিৰটোৰ আৰম্ভণিতে বজালী জিলা যোগ সমিতিৰ সভাপতি ড০ চন্দনা দেৱীয়ে তেওঁলোকক এনেকুৱা মহৎ কৰ্মৰ বাবে কৃতজ্ঞতা জ্ঞাপন কৰে৷ লগতে সম্পাদিকা ভীভা কলিতা, কিশোৰ কলিতা, পপী দাস শৰ্মা আৰু উপ- সভাপতি বিমলা বৰকটকীয়ে চিকিৎসকৰ দলটোক ফুলাম গামোচাৰে সন্মান জনায়৷ আজিৰ এই বিনামূলীয়া স্বাস্থ্য পৰীক্ষা শিবিৰটোত স্বাস্থ্য পৰীক্ষা কৰা শিশুসকলৰ পিতৃ-মাতৃসকলে সন্তোষ প্ৰকাশ কৰি বজালী জিলা যোগ সমিতিৰ সমুহ কাৰ্যকৰ্তাক তেওঁলোকৰ এনেকুৱা ব্যতিক্ৰমী জনহিতকৰ কামৰ বাবে প্ৰশংসা কৰে আৰু ভৱিষ্যতে বজালী জিলা যোগ সমিতিৰ উত্তৰোত্তৰ কামনা কৰে৷ উল্লেখ্য যেবজালী জিলা যোগ সমিতিৰ উদ্যোগত আৰু অসম যোগ সন্থাৰ সহযোগত প্ৰয়াত দময়ন্তী দাসৰ সোঁৱৰণত যোৱা ২২ মাৰ্চৰ পৰা পাঠশালাৰ হৰিমন্দিৰ প্ৰাংগনত এটি ১৫ দিনীয়া যোগ ক্ৰীড়া প্ৰশিক্ষণ শিবিৰ চলি আছে৷ এই প্ৰশিক্ষণ শিবিৰৰ লগতে সংগতি ৰাখি শিশুসকলৰ মাজত চিকিৎসা শিবিৰটোৰ আয়োজন কৰা হয়৷ আনহাতে অহা ৬ এপ্ৰিলৰ পুৱা এখন যোগ ক্ৰীড়া প্ৰতিযোগিতাৰো আয়োজন কৰা হৈছে৷ ৬ বছৰ বয়সৰ পৰা ১৮ বছৰ বয়সলৈ অনুষ্ঠিতব্য এই প্ৰতিযোগিতাত অংশগ্ৰহণ কৰিবলৈ ইচ্ছুকসকলে অহা ৩১ মাৰ্চৰ ভিতৰত বজালী জিলা যোগ সমিতিৰ সম্পাদিকা ভীভা কলিতাৰ সতে ৮৬৩৮১৪৯৮৫৮ নম্বৰত যোগাযোগ কৰিব পাৰিব বুলি অনুষ্ঠানটোৰ সভাপতি ড০ চন্দনা দেৱীয়ে জানিবলৈ দিছে৷
প্ৰেৰক কল্যাণ কলিতা