নিয়মীয়া বাৰ্তা ১৫ নৱেম্বৰঃ গুৱাহাটী চিকিৎসালয় মহাবিদ্যালয় হাস্পতাল (জিএমচিএইচ)ত প্রদান কৰা হৈছে এক লাখ পালি ক’ভিড ভেকচিন৷ দেওবাৰে এক লাখ পালি ক’ভিড ভেকচিন প্রদান সম্পন্ন হয় হাস্পতালখনত৷ মণিপুৰী জয় ব্লেছিঙত প্রদান কৰা হয় এক লাখ নম্বৰ ক’ভিড ভেকচিনৰ ড’জ৷ এই সন্দর্ভত প্রতিক্রিয়া প্রকাশ কৰি গুৱাহাটী চিকিৎসালয় মহাবিদ্যালয়ৰ অধ্যক্ষ অচ্যুত কুমাৰ বৈশ্যই চিকিৎসক, নার্ছ, স্বাস্থ্যকর্মীকে ধৰি ভেকচিন প্রদান প্রক্রিয়াত জড়িত সকলোকে কৃতজ্ঞতা জ্ঞাপন কৰে৷ ইয়াৰ লগতে সকলোকে মাস্ক পৰিধান কৰাৰ লগতে ক’ভিড প্র’টকল মানি চলিবলৈ আহ্বান জনায়৷ তেওঁ কয় যে ক’ভিড এতিয়াও সমাজৰ পৰা আঁতৰি যোৱা নাই৷ সেয়েহে ভেকচিন ল’লেও সকলোৱে ক’ভিড প্রট’কল মানি চলিব লাগে৷
ইফালে, জি এম চি এইচৰ অধ্যক্ষ অভিজিৎ শর্মাই চিকিৎসালয়খনত এক লাখ ড’জ ক’ভিড ভেকচিন সম্পূর্ণ হোৱা উপলক্ষে মুখ্যমন্ত্রী ড০ হিমন্ত বিশ্ব শর্মা আৰু স্বাস্থ্যমন্ত্রী কেশৱ মহন্তক কৃতজ্ঞতা জ্ঞাপন কৰে৷ একে সময়তে তেওঁ কয় যে হাস্পতালখনত ক’ভিডৰ প্রথম পালি আৰু দুয়োটা পালি ভেকচিন গ্রহণৰ সংখ্যা প্রায় সমান৷ আনহাতে, দেওবাৰে ৰাজ্যত নতুনকৈ ক’ভিডত আক্রান্ত হৈছে ১২৯জন লোক৷ আক্রান্ত লোকসকলৰ ভিতৰত সর্বাধিক ৫১জন কামৰূপ মহানগৰ জিলাৰ৷ দেওবাৰে ক’ভিড আক্রান্তৰ হাৰ ০.৬৩ শতাংশ৷ ক’ভিডত আক্রান্ত হৈ দেওবাৰে মৃত্যু ঘটিছে দুজন লোকৰ৷ সমান্তৰালভাৱে ক’ভিডৰ পৰা আজি সুস্থ হৈছে ২৪৩জন লোক৷ সম্প্রতি বিভিন্ন চিকিৎসালয়ত চিকিৎসাধীন ক’ভিড ৰোগীৰ সংখ্যা হৈছে ১,৮০৯জন৷