নিয়মীয়া বাৰ্তা ২৮ নৱেম্বৰঃ বিটিচি পৰিষদীয় নির্বাচনৰ দিন ক্রমশঃ চমু চাপি অহাৰ লগে লগে বিভিন্ন দল–সংগঠনৰ নির্বাচনী তৎপৰতাবৃদ্ধি পাইছে৷ ইয়াৰ মাজতে আজি প্রমোদ বডো নেতৃত্বাধীন ইউপিপিএল দলে তামুলপুৰত এক বিশাল বাইক ৰেলীৰে চমক সৃষ্টি কৰে৷ তামুলপুৰ মহকুমাৰ অধীনস্থ ২৮ নম্বৰ গয়বাৰী পৰিষদীয় সমষ্টিৰ পৰা আৰম্ভ কৰা এই বিশাল বাইক ৰেলীত কেইবাহাজাৰ লোকে ভাগ লয়৷ এই বাইক ৰেলীটোৱে তামুলপুৰৰ গয়বাৰী সমষ্টিৰ উপৰি ২৬ নম্বৰ দৰঙাজুলি, ২৭ নম্বৰ নাগ্রীজুলি, ২৯ নম্বৰ শুক্লাই ছেৰফাং আৰু ৩০ নম্বৰ গোৰেশ্বৰ সমষ্টি পৰিভ্রমণ কৰে৷বাইক ৰেলীটো উদ্বোধন কৰে প্রবীণ সাংস্কৃতিক কর্মী মদনমোহন শর্মাই৷ উদ্বোধনী ভাষণত তেওঁ কয় যে আজিৰ এই বাইক ৰেলীত ভাগ লোৱা হাজাৰ হাজাৰ লোকে কৈ দিছে যে বিটিচিত এইবাৰ ধুমুহা আহিছে, বৰদৈচিলা আহিছে পৰিৱর্তনৰ স্বার্থত আজি ৰাইজ হিলদল ভাঙি ওলাই আহিছে৷ এইবাৰৰ নির্বাচনত ইউপিপিএল দলৰ অশ্বমেধৰ ঘোঁৰা কোনেও স্তব্ধ কৰিব নোৱাৰে৷ ইপিনে, সাংবাদিকৰ লগত হোৱা আছুতীয়া সাক্ষাৎকাৰত প্রমোদবডোৱে পুনৰ হাগ্রামা মহিলাৰী নেতৃত্বাধীন বিপিএফ দলৰ বিৰুদ্ধে সৰৱ হৈ পৰে৷ হাগ্রামা মহিলাৰীয়ে কেৱল নাটক কৰিব জানে, অভিযোগ কৰিব জানে বুলি মন্তব্য কৰে প্রমোদবডোৱে৷ তেওঁ কয়– হাগ্রামা মহিলাৰীৰ সোতৰ বছৰীয়া দুর্নীতি, অনিয়ম, ভ্রষ্টাচাৰৰ বিৰুদ্ধে ৰাইজ আজি ওলাই আহিছে৷ তামুলপুৰ মহকুমাৰ পাঁচোটা সমষ্টিতে ইউপিপিএল দলৰ প্রার্থী বিজয়ী হ’ব বুলি মন্তব্য কৰি কয় যে ইউপিপিএল দলে ৩০তকৈ অধিক আসন লাভ কৰি বিটিচি পৰিষদ দখল কৰিব৷ তেওঁ কয় যে বিটিআৰত পৰিৱর্তনৰ যাত্রা আৰম্ভ হৈছে আৰু এই যাত্রা শেষ হ’বলৈ বেছিদিন নাই৷ ইউপিপিএল দলে সমমর্যাদা, সম অধিকাৰ প্রদান কৰাৰবাবে সকলো জাতি–জনগোষ্ঠীক হাগ্রামা মহিলাৰীৰ ভয়–ভাবুকিৰ পৰা উদ্ধাৰ কৰিবলৈ নামি পৰিছে৷ বিগত সোতৰ বছৰে হাগ্রামা মহিলাৰীয়ে যি ভয়– ভাবুকি তথা বিভিন্ন প্রথাৰে দমন কৰি আহিছে, ইয়াৰ পৰা সকলোকে উদ্ধাৰ কৰি এটা সুন্দৰ গণতান্ত্রিক বাতাৱৰণেৰে সকলোৱে যাতে সমমর্যাদা, সম অধিকাৰ লৈ জীয়াই থাকিব পাৰে, তাৰ বাবে ইউপিপিএল দলে এটা জাগৰণ সৃষ্টি কৰাৰ বাবে আজি এই বিশাল বাইক ৰেলী উলিয়াইছে৷