🔹 হত্যাকাৰী খৰ্গেশ্বৰক আটক
নিয়মীয়া বাৰ্তা, ১৫ অক্টোবৰ : শনিবাৰে নিশা চতিয়াৰ উত্তৰাঞ্চলৰ ভেলৌগুৰিৰ সমীপৰ দয়না পুখুৰীত এক লোমহৰ্ষক হত্যাকাণ্ড সংঘটিত হয় ৷ প্ৰাপ্ত খবৰ মতে, স্বামীৰ ছুৰিকাঘাতত প্ৰাণ গ’ল এগৰাকী দুৰ্ভগীয়া পত্নীৰ ৷ ঘটনাৰ বিৱৰণী মতে, শনিবাৰে নিশা প্ৰায় সাত বজাত দয়না পুখুৰী গাঁৱৰ খৰ্গেশ্বৰ স্বৰ্গীয়াৰীৰ পত্নী ৰীতা স্বৰ্গীয়াৰী ওচৰতে থকা দেওৰেকৰ ঘৰলৈ আহিছিল ৷ ৰীতা স্বৰ্গীয়াৰী দেওৰেকৰ ঘৰত থকা সময়তে খৰ্গেশ্বৰ স্বৰ্গীয়াৰীয়ে পত্নীক লগ ধৰিবলৈ ভায়েকৰ ঘৰলৈ আহে ৷ খৰ্গেশ্বৰৰ ভাতৃয়ে জনোৱা মতে, তেওঁৰ ঘৰতে পতি-পত্নীৰ মাজত তৰ্ক-বিতৰ্ক লাগে। উত্তেজিত হৈ পৰা খৰ্গেশ্বৰে লগত নিয়া এখন ছুৰীৰে পত্নীৰ বুকুত আঘাত কৰাত ঘটনাস্থলীতে ৰীতাৰ মৃত্যু হয় ৷ হত্যাকাৰী খৰ্গেশ্বৰে ছুৰীখন পেলাই ঘটনাস্থলীৰ পৰা পলায়ন কৰে ৷ স্থানীয় ৰাইজে ঘটনা সন্দৰ্ভত চতিয়া আৰক্ষীক অৱগত কৰাত চতিয়া আৰক্ষীৰ এটা দল ঘটনাস্থলীত উপস্থিত হয় ৷ চতিয়া আৰক্ষীয়ে নিশাই স্থানীয় লোকৰ সহায়ত অভিযান চলাই হত্যাকাৰী স্বামী খৰ্গেশ্বৰক আটক কৰে ৷ চতিয়া আৰক্ষীয়ে ৰীতাৰ মৃতদেহ চতিয়া থানালৈ আনি আজি মৰণোত্তৰ পৰীক্ষাৰ বাবে প্ৰেৰণ কৰে ৷
প্ৰেৰক প্ৰণৱ ওজা