কলাত ১২৭, বিজ্ঞানত ২৩২, বাণিজ্যত ১৩৭ স্থান জাগীৰোড কলেজৰ

নিয়মীয়া বাৰ্তা ২৮ জুনঃ মৰিগাঁও জিলাৰ জাগীৰোড মহাবিদ্যালয়ে পুনৰ দেশৰ শীর্ষস্থানীয় মহাবিদ্যালয়ৰ তালিকাত স্থান লাভ কৰিবলৈ সক্ষম হৈছে৷ দেশৰ শ্রেষ্ঠ শিক্ষনুষ্ঠান নির্বাচনৰ উদ্দেশ্যে ‘ইণ্ডিয়া টুডে’ই প্রতিবছৰে সমীক্ষা কৰি আহিছে৷ সেই অনুসৰি ২০২১ বর্ষৰ ফলাফল ২৬ জুনত ঘোষণা কৰিছে৷ এই ফলাফল অনুসৰি জাগীৰোড মহাবিদ্যালয়ৰ কলা, বিজ্ঞান আৰু বাণিজ্য তিনিওটা শাখাই পুনৰ সন্মানজনক স্থান লাভ কৰি জিলাখনৰ লগতে ৰাজ্যখনলৈ গৌৰৱ কঢ়িয়াই আনিবলৈ সক্ষম হৈছে৷

উল্লেখ্য যে জাগীৰোড মহাবিদ্যালয় অসমৰ একমাত্র উচ্চ শিক্ষাৰ অনুষ্ঠান যিখনে তিনিওটা শাখাতে স্থান লাভ কৰিবলৈ সক্ষম হৈছে৷ এইবর্ষৰ ঘোষিত ফলাফল অনুসৰি মহাবিদ্যালয়খনৰ কলা শাখাই ১২৭, বিজ্ঞান শাখাই ২৩২ আৰু বাণিজ্য শাখাই ১৩৭ সংখ্যক স্থান অধিকাৰ কৰিছে৷ স্মর্তব্য যে মহাবিদ্যালয়খনৰ বাণিজ্য শাখাই বিগত তিনিটা বর্ষতে ধাৰাবাহিকভাৱে দেশৰ আগশাৰীৰ শিক্ষানুষ্ঠান হিচাপে ইয়াৰ গৌৰৱ অটুট ৰাখিবলৈ সক্ষম হৈছে৷ এইবাৰ ইয়াৰ বাণিজ্য শাখাই ৰাজ্যৰ প্রথম আৰু বিজ্ঞান শাখাই দ্বিতীয় স্থান লাভ কৰিবলৈ সক্ষম হোৱাৰ বাবে জাগীৰোড মহাবিদ্যালয়ৰ অধ্যক্ষ ড০ ভবেন চন্দ্র নেওগৰ লগতে মহাবিদ্যালয়ৰ পৰিয়াল উৎফুল্ল হৈছে৷