নিয়মীয়া বাৰ্তা, ৪ এপ্ৰিল: সমাগত তৃতীয় পর্যায়ৰ নির্বাচনলৈ মাজত মাথোঁ দুদিন বাকী থকাৰ সময়তে সৰুক্ষেত্রী সমষ্টিত বিক্ষিপ্ত ঘটনা সংঘটিত হৈছে৷ বৰপেটা জিলাৰ ৪৬নং সৰুক্ষেত্রী বিধানসভা সমষ্টিৰ অন্তর্গত কয়াকুছিত থকা মিত্রজোঁটৰ নির্বাচনী কার্যালয়ত শুকুৰবাৰে নিশা ৯মান বজাত প্রায় ৪০জনীয়া এটা দুর্বৃত্তৰ দলে বেনাৰ–পোষ্টাৰ, হর্ডিং আদি জ্বলাই দিয়ে৷
সমষ্টিটোৰ প্রাণকেন্দ্রস্বৰূপ কয়াকুছি বজাৰত থকা মিত্রজোঁটৰ নির্বাচনী কার্যালয়ত এনেদৰে অগ্নিসংযোগৰ ঘটনা সংঘটিত হোৱাত ৰাইজৰ মাজত বিশেষ ৰহস্য সৃষ্টি কৰিছে৷
ঘটনা সন্দর্ভত আৰক্ষী সূত্রই সদৰী কৰা মতে, কালি কয়াকুছিত থকা মিত্রজোঁটৰ অন্যতম অংশীদাৰ অগপ প্রক্ষেপিত প্রার্থী কল্পনা পাটোৱাৰীৰ নির্বাচনী কার্যালয়টোৰ সন্মুখত হঠাৎ প্রায় ৪০জনীয়া এটা দল উপস্থিত হৈ মনেসজা কিছু কথাৰ অৱতাৰণা কৰি টকা খুজি হুলস্থূল লগায়৷ পাছত ইয়াৰে একাংশই কার্যালয়ত প্রৱেশ কৰি বেনাৰ, পোষ্টাৰ, হর্ডিং আদি জ্বলাই দিয়ে৷
আনকি আচবাব–পত্র লণ্ডভণ্ড কৰাৰ ফলত এক উত্তপ্ত পৰিস্থিতি সৃষ্টি হয়৷ পাছত কয়াকুছি আৰক্ষী ঘটনাস্থলীত উপস্থিত হৈ পৰিস্থিতি নিয়ন্ত্রণলৈ আনিবলৈ সক্ষম হয়৷ ইপিনে ঘটনা সংক্রান্তত দুজন লোকক নিশাই আৰক্ষীয়ে আটক কৰে যদিও আজি তেওঁলোকক মুকলি কৰি দিয়া বুলি জানিব পৰা গৈছে৷