বিশেষ বাৰ্তা, ১৩ জুনঃ মৰিয়নিৰ নাগাজাংকাৰ গড়মুৰ গাঁও নিৱাসী, যুৱ অভিযন্তা নিতু ৰাজকোঁৱৰ (২৮) ৰ কালি লক্ষ্ণৌৰ সমীপত হোৱা এক শোকাবহ পথ দুৰ্ঘটনাত মৃত্যু হৈছে । নিতু ৰাজকোঁৱৰ গুৱাহাটীৰ নুনমাটি শোধনাগাৰত কনিষ্ঠ অভিযন্তা হিচাপে কৰ্মৰত অৱস্থাত আছিল । ঘটনাৰ সন্দৰ্ভত জানিব পৰা মতে, নিতু ৰাজকোঁৱৰে তিনিজন বন্ধুৰ সৈতে লাডাখলৈ মটৰ চাইকেল লৈ গৈছিল । দীৰ্ঘ দুৰত্বত মটৰ চাইকেল চলাই পূৰ্বৰে পৰা ভালপোৱা নিতুৱে লাডাখৰ পৰা উভতিও আহিছিল । কিন্তু কালি পুৱা প্ৰায় ১০-৩০ মান বজাত লক্ষ্ণৌৰ সমীপত এক ভয়াবহ দুৰ্ঘটনাত পতিত হয় আৰু দুৰ্ভাগ্যজনকভাৱে মৃত্যুক আকোৱালি লয় । মৰিয়নিৰ নাগাজাংকাৰ গড়মুৰ গাঁৱৰ নিবাসী প্ৰণৱ ৰাজকোঁৱৰ আৰু অনু গগৈ ৰাজকোঁৱৰৰ একমাত্ৰ সন্তান প্ৰয়াত নিতু পঢ়াশুনাত সৰুৰে পৰাই মেধাৱী আছিল । মৰিয়নিৰ মহাদেৱ আগৰৱালা উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষাত উত্তীৰ্ন হোৱাৰ পিছত মৰিয়নি মহাবিদ্যালয়ত উচ্চতৰ মাধ্যমিকত অধ্যয়ন কৰে । পিছত যোৰহাট প্ৰিন্স অৱ ৱেলছত শিক্ষাগ্ৰহণ কৰি তাৰ পৰাও সুখ্যাতিৰে উত্তীৰ্ন হয়। কিছুদিন দুলীয়াজানত থকাৰ পিছত নুনমাটি শোধনাগাৰত কনিষ্ঠ অভিযন্তা হিচাপে যোগদান কৰিছিল । সম্প্ৰতি তাতেই থাকিবলৈ লৈছিল যুৱ অভিযন্তাজনে । জানিব পৰা মতে পিতৃ মাতৃকো লৈ গৈছিল তালৈ । কিন্তু নিয়তিৰ ওচৰত হাৰ মানিলে সকলোৰে মাজত জনপ্ৰিয় নিতুৱে ।অত্যন্ত অমায়িক আৰু ভদ্ৰ যুৱ অভিযন্তাজনৰ আকস্মিক মৃত্যুত নাগাজাংকাৰ লগতে মৰিয়নি অঞ্চলত শোকৰ ছাঁ পৰিছে । আজি সন্ধিয়া মৃতদেহ বিমান যোগে গুৱাহাটী আহি পোৱাৰ পিছত এক শোকাকুল পৰিবেশৰ সৃষ্টি হয় । তাতেই অন্তিম শ্ৰদ্ধাঞ্জলি জনোৱাৰ পিছত নৱগ্ৰহ শ্মশানত বহু গুণমুগ্ধৰ উপস্থিতিত অন্ত্যষ্টিক্ৰিয়া সম্পন্ন কৰা হয় ।পিতৃ প্ৰণৱ ৰাজকোঁৱৰ আৰু মাতৃ অনু গগৈ ৰাজকোঁৱৰয়ে একমাত্ৰ সন্তানক হেৰুৱাই শোকাহত হৈ পৰিছে । নিতুৰ মৃত্যুত মৰিয়নি মহাদেৱ আগৰৱালা উচ্চতৰ মাধ্যমিক বিদ্যালয়ৰ প্ৰাক্তন ছাত্ৰ সন্মিলন, নাগাজাংকা যুৱ সমাজ, মৰিয়নিৰ কিংশুক আদি বহু সংগঠনে গভীৰ শোক প্ৰকাশ কৰিছে আৰু শোকসন্তপ্ত পৰিয়াললৈ সমবেদনা জ্ঞাপন কৰিছে ।
প্ৰেৰক দিব্যজ্যোতি শইকীয়া