বিশেষ বাৰ্তা, ১৩ জুনঃ আজি মধ্যাহ্ন ভোজন আঁচনিৰ কৰ্মচাৰীসকলে নগাঁৱত উত্তাল প্ৰতিবাদ সাব্যস্ত কৰে। সদৌ অসম মধ্যাহ্ন ভোজন কৰ্মচাৰী ইউনিয়নৰ নগাঁও জিলা সমিতিৰ উদ্যোগত জিলাখনৰ মধ্যাহ্ন ভোজন আচনিৰ কৰ্মচাৰীসকলে এই প্ৰতিবাদ সাব্যস্ত কৰে। মধ্যাহ্ন ভোজন আঁচনি ব্যক্তিগতকৰণৰ বিৰুদ্ধে আৰু পাঁচ মাহৰ বকেয়া মাননি আদায়ৰ দাবীত কৰ্মচাৰীসকলে এই কাৰ্যসূচী ৰূপায়ণ কৰে । প্ৰতিবাদকাৰীসকলে মধ্যাহ্ন ভোজন আঁচনি ব্যক্তিগতকৰণ বাতিল কৰক, প্ৰাপ্য বকেয়া আদায় দিয়ক, মধ্যাহ্ন ভোজন আঁচনিৰ কৰ্মচাৰীৰ চাকৰি নিয়মীয়া কৰক আদি বিভিন্ন ধ্বনি দি উত্তাল পৰিৱেশৰ সৃষ্টি কৰে। প্ৰতিবাদকাৰীসকলে নগাঁও চহৰৰ মতিৰাম বৰা উদ্যানৰ সন্মূখত অবস্থান ধৰ্মঘট কাৰ্যসূচী ৰূপায়ণ কৰাৰ অন্তত সমদল কৰি আহি জিলা উপায়ুক্তৰ কাৰ্যালয়লৰ সন্মূখত ধৰ্না দিয়ে। ইয়াতো প্ৰতিবাদকাৰীসকলে বিভিন্ন ধ্বনি দি উত্তাল পৰিবেশৰ সৃষ্টি কৰে। প্ৰতিবাদকাৰীসকলে তেওঁ লোকৰ দাবীসমূহ পূৰণ কৰাৰ বাবে জিলা উপায়ুক্তৰ হাতত এখন স্মাৰক পত্ৰ প্ৰদান কৰে।
প্ৰেৰক কনক হাজৰিকা