নিয়মীয়া বাৰ্তা ১৫ মাৰ্চঃ বিজেপিক উৎখাতৰ লক্ষ্যৰে কংগ্রেছৰ সৈতে মহাজোঁটবন্ধন কৰি কার্যতঃ ক্ষতিৰ সন্মুখীনহে হ’ল সাংসদ বদৰুদ্দিন আজমল নেতৃত্বাধীন এ আই ইউ ডি এফ দল৷ মহাজোঁটৰ অংশীদাৰ হোৱা বাবেই দলটোৱে এইবাৰ বহুকেইটা বিজয়ৰ সম্ভাৱনাপূর্ণ সমষ্টি এৰিবলগীয়াত পৰে৷ এই ঘটনাই দলটোৰ ভিতৰচ’ৰাত ইতিমধ্যে তীব্র জোকাৰণি সৃষ্টি কৰিছে৷ জিলাই জিলাই দলটোৰ নেতা আৰু কর্মীসকলে আজমলৰ বিৰুদ্ধে মুকলিকৈ বিষোদগাৰ প্রকাশ কৰিছে৷ শেহতীয়াকৈ কংগ্রেছৰে আসন বুজাবুজি আৰু দলীয় টিকটকেন্দ্রিক সংঘাতৰ বাবে এ আই ইউ ডি এফত উলম্ব বিভাজন ঘটিল৷ বদৰুদ্দিন আজমলৰ অতিকে ঘনিষ্ঠ এ আই ইউ ডি এফৰ কেন্দ্রীয় কমিটীৰ নেতা নুৰুল আমিন চৌধুৰী আৰু মতিউৰ ৰহমানে বিশেষভাৱে উদ্যোগ গ্রহণ কৰি জন্ম দিলে এ ইউ ডি এফ (আছাম ইউনাইটেড ডেম’ক্রেটিক ফ্রণ্ট) নামৰ নতুন ৰাজনৈতিক দল এটাৰ৷
আজমলৰ কর্মকাণ্ডত অসন্তুষ্ট হৈ পৰা এ আই ইউ ডি এফৰ নেতা–কর্মীক লৈয়েই গঠন কৰিছে এই এ ইউ ডি এফ নামৰ দলটো৷ মন কৰিবলগীয়া এয়ে যে এই নতুন দলটোৰ নির্বাচনী প্রতীকো প্রায় এ আই ইউ ডি এফৰ সৈতে একেই৷ এ আই ইউ ডি এফৰ তলা–চাবি প্রতীকৰ বিপৰীতে এ ইউ ডি এফ দলে প্রতীক হিচাপে লৈছে চাবি৷ অহা ২৭ মার্চত প্রথম পর্যায়ত ভোটগ্রহণ হ’বলগীয়া ৪৭টা সমষ্টিৰ ভিতৰত এ ইউ ডি এফৰ বেনাৰত বটদ্রৱাত মতিউৰ ৰহমান আৰু ৰূপহীহাটত নুৰুল আমিন চৌধুৰী নির্বাচনত অৱতীর্ণ হৈছে৷ ইতিমধ্যে দুয়োটা সমষ্টিতে দুয়োগৰাকী প্রার্থীয়ে নতুন দলটোৰ নাম আৰু প্রতীকেৰে বেনাৰ–পোষ্টাৰ লগাই নির্বাচনী প্রচাৰকার্য তুংগত তুলিছে৷ প্রথম পর্যায়ৰ নির্বাচনত তেওঁলোক দুজনেই অৱতীর্ণ হৈছে যদিও দ্বিতীয় আৰু তৃতীয় পর্যায়ৰ নির্বাচনত বহুকেইগৰাকী প্রার্থী তেওঁলোকে প্রক্ষেপ কৰিব বুলি জানিবলৈ দিছে৷
এ আই ইউ ডি এফৰ বর্তমান দখলত থকা তথা বিজয়ৰ সম্ভাৱনা থকা যিবোৰ সমষ্টি আজমলে মহাজোঁটৰ অংশীদাৰ দলক এৰি দিব, সেই সমষ্টিসমূহত এ ইউ ডি এফে নিজাববীয়াকৈ প্রার্থী থিয় কৰাই আজমলৰ সিদ্ধান্তৰ প্রত্যাহ্বান জনাব বুলি তেওঁলোকে প্রকাশ কৰে৷ এনে পৰিস্থিতিত আজমলে কংগ্রেছৰে আসন বুজাবুজি কৰি এ আই ইউ ডি এফৰ লগতে কংগ্রেছকো কিমান উপকৃত কৰিব পাৰে, সেয়া সময়তহে ক’ব পৰা যাব৷ কিন্তু সাম্প্রতিক দৃশ্যপটত এটা কথাই স্পষ্ট হৈ পৰিছে– মহাজোঁটৰ অংশীদাৰ হোৱাৰ ফলত ৰাজ্যৰ সংখ্যালঘু ৰাজনীতিত ইমানদিনে ফেক্টৰ হিচাপে পৰিগণিত হৈ অহা আজমল যেন ক্রমাৎ নিশকটীয়া হোৱাৰ দিশেহে অগ্রসৰ হ’ল৷