নিয়মীয়া বাৰ্তা, ১৪ মাৰ্চঃ অসমৰ জনপ্রিয় বিনোদনধর্মী চেনেল ৰঙে আজিৰ পৰা নিশা ৯.৩০ বজাত দর্শকলৈ আগবঢ়াব এখন নতুন ধাৰাবাহিক ‘মনগীত’৷ ৰং চেনেলৰ নিজা প্রযোজনাৰে নির্মাণ হোৱা ধাৰাবাহিকখনৰ পৰিচালকৰ দায়িত্ব গ্রহণ কৰিছে ধ্রুৱজ্যোতি কাশ্যপে৷ ধাৰাবাহিকখনৰ সংলাপ আৰু চিত্রনাট্য বিশ্বজ্যোতি ডেকাৰ৷ মানুহৰ জীৱনলৈ প্রেম এবাৰেই আহে নে বাৰে বাৰে আহে? নাৰী আৰু পুৰুষৰ মিলন হয় প্রেমৰ মাজেৰে গঢ় লৈ উঠা সম্পর্কৰ পাছত৷ কেতিয়াবা দুয়োজনৰ মাজত মিলন হোৱাৰ পাছতো প্রেম হোৱা দেখা যায়৷ কিন্তু মনজিত আৰু গীতিকাৰ মাজত কোনো প্রেম নাছিল৷ বাধ্যত পৰি গীতিকাই মনজিতৰ পত্নী ধর্ম পালন কৰিছিল৷ বাধ্যত পৰি এটা পৱিত্র সম্পর্কক আঁকোৱালি লোৱা গীতিকাৰ জীৱনৰ সংঘাত–ত্যাগ আৰু বেদনাৰে সজাই তোলা হৈছে মনগীতৰ কাহিনী৷ গীতিকাৰ জীৱনত কিয় এনে হ’ল? তাই এটা সুন্দৰ বৈবাহিক জীৱন লাভ কৰিব পাৰিবনে? এটা পৰিয়ালৰ কিছুমান সঁচা ঘটনা আপোনালোকে এইখন ধাৰাবাহিকত উপভোগ কৰিবলৈ পাব৷
‘মনগীত’ৰ প্রতিটো চৰিত্রই দর্শকৰ মনত সাঁচ বহুৱাই সুকীয়া স্থান দখল কৰিব৷ ‘মনগীত’ৰ মুখ্য চৰিত্রত দেখা যাব অসমৰ বহুতো জনপ্রিয় অভিনেতা–ভিনেত্রীক৷ দেখা যাব ৰাতুল দাস, হিমাক্ষী কলিতা, নীলাক্ষি শইকীয়া, সাগৰ নীল, নৱদীপ বৰগোহাঁই, হিমাদ্রী দেৱী, প্রিয়ংকা দাস, ৰাতুল ভূঞা, ৰাখী শইকীয়া আদিৰ লগতে বহুতো ন–পুৰণি শিল্পীক৷ ‘মনগীত’ৰ চিত্রগ্রহণ কৰিছে গণেশ কলিতাই৷ সহকাৰী পৰিচালক পার্থপ্রতিম হালৈ৷ ৰূপসজ্জা দীপান্বিতা লাংথাছা, কলা নির্দেশক বিকাশ মুছাহাৰী, সম্পাদনা ৰমেন বৰা, গ্রাফিক্স ৰাকেশ, দীপাংকৰ, পৰিবহণ পৱন কাকতি, পোহৰ নাৰায়ণ, হেমন্ত, কপিল, ৰাহুল৷ প্রযোজনা নিয়ন্ত্রকৰ দায়িত্বত আছে বিকাশ খেল্মা৷ ‘মনগীত’ ধাৰাবাহিকখনৰ কাহিনীয়ে দর্শকক এক নতুন সোৱাদ দিব বুলি পৰিচালক, অভিনেতা–ভিনেত্রী, কলা–কুশলী সকলোৱে আশা প্রকাশ কৰিছে৷ সেইবাবে আজি নিশা ৯.৩০ বজাত সম্প্রচাৰ হ’ব লগা ‘মনগীত’ ধাৰাবাহিকখন সকলোৱে চাই মৰম দিব বুলি সকলো আশাবাদী৷