নিয়মীয়া বাৰ্তা ৪ জুনঃ লকডাউনৰ সুযোগ গ্ৰহণ কৰি একাংশ দুস্কৃতিকাৰীয়ে নগাঁৱত সংঘটিত কৰি আহিছে ইটোৰ পিছত সিটোকৈ চুৰিৰ ঘটনা। যোৱা নিশা নগাঁও চহৰৰ এগৰাকী ফটো সাংবাদিকৰ ঘৰত চোৰে চলালে ছাফাই অভিযান। নগাঁৱৰ মাজৰ আটিৰ অৰ্পন বৰা নামৰ ফটো সাংবাদিক গৰাকীৰ ঘৰত যোৱানিশা চোৰে খিৰিকিৰে প্ৰৱেশ কৰি নগদ দহ হেজাৰ টকা সহ সোণৰ গহনালৈ উধাও হয়। যোৱা নিশাইয়ে অৰ্পন বৰাৰ প্ৰতিৱেশী অনিল কুমাৰ যাদৱৰ ঘৰৰ চৌহদৰ পৰা এখন পালছাৰ বাইক চুৰি কৰি নিয়ে চোৰৰ দলে। এই চুৰি কাণ্ডৰ সমগ্ৰ দৃশ্য বন্দি হৈ ৰয় চি চি টি ভি কেমেৰাত। এই চুৰি কাণ্ডক লৈ নগাঁৱৰ হয়বৰগাঁও আৰক্ষীয়ে তদন্ত অব্যাহত ৰাখিছে যদিওঁ বাতৰি লিখা সময়লৈকে কোনো লোকক গ্ৰেপ্তাৰ কৰিব পৰা নাই আনহাতে তিনি দিনৰ পূৰ্বে নগাঁও চহৰৰ মাজমজিয়াত ৰেনেছাঁ মাধ্যমিক বিদ্যালয়ত দিন দুপৰতে চোৰৰ দলে এটা ইনভাইটাৰ ছেট চুৰি কৰি লৈ যায়। এনেদৰে ইটোৰ পিছত সিটোকৈ চুৰি কাণ্ড সংঘটিত হৈ আহিছে যদিও চহৰ খনত চুৰি কাণ্ড ৰোধ কৰাত আৰক্ষী সফল হ’ব পৰা নাই।