নিয়মীয়া বাৰ্তা, ২২ জুনঃ: ‘মই বিজেপি দলত যোগদান কৰিম বুলি একাংশ সংবাদ মাধ্যমত বাতৰি প্ৰকাশ হৈছে । এইবোৰ ভিত্তিহীন তথা অপপ্ৰচাৰ । ইয়াৰ বিৰুদ্ধে মই মানহানিৰ গোচৰ তৰিম ।’ আজি বিয়লি চিৰাং জিলাৰ সদৰ কাজলগাঁওস্থিত জিলা বিপিএফ দলৰ মুখ্য কাৰ্যালয় চৌহদত দলত যোগদান অনুষ্ঠানৰ পাছত বিপিএফৰ অন্যতম শক্তিশালী নেতা তথা চিদলী বিধানসভা সমষ্টিৰ বিধায়ক চন্দন ব্ৰহ্মই সংবাদ মাধ্যমৰ আগত এইদৰে মন্তব্য কৰে । বিপিএফ নেতাৰ উপৰিও ৰাজ্য চৰকাৰৰ এজন মন্ত্ৰী চন্দন ব্ৰহ্মই মিত্ৰ দল বিজেপিত যোগান কৰা বুলি প্ৰকাশিত বাতৰিৰ আঁত ধৰি সাংবাদিকে সোধা প্ৰশ্নৰ উত্তৰত মন্ত্ৰী ব্ৰহ্মই লগতে কয় যে হাগ্ৰামা মহিলাৰীৰ সবল নেতৃত্বত বিপিএফ দলে বিটিচিৰ (বিটিআৰ) শাসনত পুনৰ অধিষ্ঠিত হ’ব। বিপিএফ দলে আগন্তুক বিটিচিৰ নিৰ্বাচনত অতি কমেও ৩০ খন আসন দখল কৰিবলৈ সক্ষম হ’ব। বিপিএফ কৰ্মী কোনেও দল ত্যাগ কৰা নাই । বৰং অন্য দল ত্যাগ কৰি বহু সংখ্যকে হাগ্ৰামা মহিলাৰীৰ নেতৃত্বত আস্থা প্ৰকাশ কৰি দলটোত যোগান কৰি আছে। আজিও চিৰাং জিলা এআইইউডিএফ দলৰ সাধাৰণ সম্পাদক মজিদুল হকৰ নেতৃত্বত ৭০ জন কৰ্মী তথা সমৰ্থকে বিপিএফ দলত যোগদান কৰে ।আজি বিপিএফ দলত যোগদান কৰা কৰ্মী তথা সমৰ্থক সকলক মন্ত্ৰী চন্দন ব্ৰহ্মই ফুলাম গামোচাৰে উষ্ম আদৰণি জনায় ।