বজাৰ–ৰাজপথত মুকলিকৈ উলংঘা ক’ভিড প্রট’কল

নিয়মীয়া বাৰ্তা, ১০ জুলাইঃ ৰাজ্যৰ অধিকাংশ জিলাতেই আক্রান্তৰ হাৰ ১০ শতাংশতকৈ অধিক হোৱাৰ পৰিপ্রেক্ষিতত উদ্বিগ্নতা প্রকাশ কৰি কেন্দ্রীয় চৰকাৰে ৰাজ্যৰ মুখ্য সচিবলৈ প্রেৰণ কৰিছে পত্র৷ শীঘ্রে এই জিলাসমূহত আক্রান্তৰ হাৰ নিয়ন্ত্রণলৈ আনিবলৈ কেন্দ্রীয় চৰকাৰে নির্দেশ দিয়াৰ সময়তে ৰাজ্যত নিতৌ ভংগ হৈছে ক’ভিড প্রট’কল৷ চৰকাৰী নীতি–নির্দেশনাক অমান্য কৰি বজাৰ, ৰাজপথত প্রতিদিনে মুকলিকৈয়ে একাংশই উলংঘা কৰিছে ক’ভিডৰ সকলো প্রট’কল৷

সঠিকভাৱে মাস্ক পৰিধান নকৰি তথা সামাজিক দূৰত্ব মানি নচলি অসচেতন এইসকল লোকে বিপদ মাতিছে সমাজলৈ৷ মুঠ ৭খন জিলাত সম্পূর্ণ কণ্টেইনমেণ্ট জ’ন ঘোষণা কৰিবলৈ ৰাজ্য চৰকাৰ বাধ্য হৈ পৰাৰ সময়তে ক’ভিড সম্পর্কীয় নীতি–নির্দেশনা শিথিল কৰা জিলাসমূহত নিতৌ উলংঘা হৈছে ক’ভিড প্রট’কল৷ আৰক্ষী–প্রশাসনৰ দুর্বল ভূমিকাৰ সুযোগ লৈ ক’ভিড প্রট’কল ভংগ কৰাৰ ফলত আগন্তুক সময়ত বিভিন্ন নীতি–নির্দেশনা শিথিল হোৱা জিলাসমূহতো সংক্রমণ বৃদ্ধি পোৱাটো একপ্রকাৰ নিশ্চিত হৈ পৰিছে৷

বিশেষকৈ ৰাজধানী চহৰ গুৱাহাটীত নিতৌ ক’ভিড প্রট’কল ভংগৰ ঘটনাই প্রতিক্রিয়া সৃষ্টি কৰিছে৷ বিয়লি ৫ বজাৰ পাছত সান্ধ্য আইন বলৱৎ হয় যদিও গুৱাহাটীৰ ৰাজপথত নকমে যান–বাহনৰ ভিৰ৷ সান্ধ্য আইন বলৱৎ হোৱাৰ বহু পিছলৈ গুৱাহাটীৰ ৰাজপথত চিটীবাছকে ধৰি অন্যান্য ৰাজহুৱা সেৱাৰ বাহনৰ চলাচল পৰিলক্ষিত হয়৷ তদুপৰি ব্যক্তিগত বাহনৰ চলাচলে সান্ধ্য আইনৰ পাছতো ৰাজপথত সৃষ্টি কৰে যান–জঁট৷ তৎসত্ত্বেও নিষ্ক্রিয় হৈ থকা পৰিলক্ষিত হয় মহানগৰ আৰক্ষী আৰু প্রশাসন৷

মহানগৰীত শেহতীয়াকৈ পুনৰ আক্রান্তৰ সংখ্যা বৃদ্ধি পোৱাৰ বাবে স্বাস্থ্যমন্ত্রীয়ে আৰক্ষীক কঠোৰ হ’বলৈ নির্দেশ দিয়াৰ পাছত কালি গঠন কৰা হৈছিল টাস্ক ফ’চ৷ এই টাস্ক ফ’চসমূহৰ সামগ্রিক দায়িত্ব দিয়া হৈছে কামৰূপ মহানগৰ জিলাৰ এ চি এছ বিষয়া নিবেদন দাস পাটোৱাৰীক৷ তেওঁক সহযোগ কৰিব আন এগৰাকী এ চি এছ বিষয়া শর্মিষ্ঠা বৰাই৷ সেইদৰে পূব, কেন্দ্রীয় আৰু পশ্চিম আৰক্ষী জিলাৰ বাবেও গঠন কৰা হৈছে সুকীয়া সুকীয়া টাস্ক ফ’চ৷ মহানগৰীখনত সান্ধ্য আইন ভংগৰ ঘটনা ৰোধ কৰাৰ বাবে গঠন কৰা এই টাস্ক ফ’র্চো কার্যতঃ নিষ্ক্রিয় হৈ থকা পৰিলক্ষিত হৈছে৷ তালাচীৰ নামত মহানগৰ আৰক্ষীয়ে মাত্র কেইটামান নির্ধাৰিত স্থানত বাহৰ পাতি থকাৰ পৰিৱর্তে কোনোধৰণৰ সক্রিয় ভূমিকা গ্রহণ কৰা পৰিলক্ষিত হোৱা নাই৷ ফলস্বৰূপে শুকুৰবাৰে বিয়লি ৫ বজাৰ পাছতো নকমিল মহানগৰীৰ ৰাজপথৰ যান–জঁট৷

উল্লেখ্য যে ক’ভিডৰ প্রথম লহৰৰ সময়ত আৰক্ষীয়ে পালন কৰা ভূমিকাক সকলোৱে প্রশংসা কৰিছিল৷ বিশেষকৈ লকডাউন কঠোৰভাৱে বলৱৎ কৰিবলৈ ৰাজ্যৰ অলিয়ে–গলিয়ে পহৰা দিয়া পৰিলক্ষিত হৈছিল অসম আৰক্ষীৰ৷ লকডাউন ভংগকাৰীক জৰিমনা বিহাৰ লগতে লঘু শাস্তিও প্রদান কৰিছিল আৰক্ষীয়ে৷ কিন্তু শেহতীয়াকৈ ক’ভিড প্রট’কলসমূহ বলৱৎ কৰাৰ ক্ষেত্রত আৰক্ষীয়ে যথেষ্ট নমনীয় ভূমিকা গ্রহণ কৰিছে৷ যাৰ বাবে বজাৰে–সমাৰে তথা ৰাজপথত মুকলিকৈয়ে ক’ভিড প্রট’কল ভংগ কৰিবলৈ সাহস পাইছে সাধাৰণ ৰাইজে৷ তদুপৰি আন্তঃজিলা যাতায়াত নিষিদ্ধ কৰা হৈছে যদিও এতিয়াও বহু স্থানত যান–বাহনৰ চলাচল বিভিন্ন জিলাৰ মাজত অব্যাহত আছে৷ শীঘ্রে আৰক্ষী–প্রশাসনে ক’ভিড প্রট’কল বলৱৎ কৰিবলৈ কঠোৰ নহ’লে ক’ভিডৰ সংক্রমণে ৰাজ্যজুৰি পুনৰ গুৰুতৰ ৰূপ যে ধাৰণ কৰিব, তাক নুই কৰিব নোৱাৰি৷

উল্লেখ্য যে ধাৰাবাহিকভাৱে মহানগৰীখনত ক’ভিড প্রট’কল ভংগৰ বাতৰি প্রকাশ পাই অহাৰ পাছত আজি কিছু কঠোৰ হৈ পৰা পৰিলক্ষিত হয় মহানগৰ আৰক্ষী৷ নিশাৰ ভাগত মহানগৰীৰ কেইবাটাও স্থানত মহানগৰ আৰক্ষীয়ে অভিযান চলাই সান্ধ্য আইন ভংগ কৰা একাংশ বাহন জব্দ কৰাৰ লগতে জৰিমনা বিহে৷

ইফালে ৰাজ্যত অব্যাহত আছে ক’ভিডৰ সংক্রমণ৷ শুকুৰবাৰে নতুনকৈ ক’ভিডত আক্রান্ত হৈছে ২,৪৯৩জন লোক৷ আক্রান্তসকলৰ ভিতৰত সর্বাধিক ২৪৭জন কামৰূপ মহানগৰ জিলাৰ৷ তদুপৰি গোলাঘাটৰ ২০৯জন, যোৰহাটৰ ১৭৬জন আৰু লখিমপুৰৰ ১৭৩জন লোক নতুনকৈ ক’ভিডত আক্রান্ত হৈছে৷ বিগত ২৪ ঘণ্টাত ৰাজ্যত মুঠ ১,১৭,০৮৭টা নমুনাৰ পৰীক্ষা সম্পন্ন কৰা হৈছে৷ আক্রান্তৰ হাৰ হৈছে ২.১৩ শতাংশ৷ শুকুৰবাৰে সুস্থ হোৱা ৰোগীৰ সংখ্যা হৈছে ২,৪৮১জন৷ সম্প্রতি চিকিৎসাধীন হৈ আছে ২১,৬৮৯জন লোক৷

ইপিনে শুকুৰবাৰে ক’ভিডত আক্রান্ত হৈ মৃত্যুক আঁকোৱালি লৈছে ২৪জন লোকে৷ মৃত্যু হোৱা লোকসকলৰ ভিতৰত সর্বাধিক তিনিজনকৈ লোকৰ মৃত্যু ঘটিছে ডিব্রুগড় আৰু কামৰূপ মহানগৰ জিলাত৷ তদুপৰি গোৱালপাৰা–কার্বি আংলং–শোণিতপুৰ–তিনিচুকীয়া দুজনকৈ আৰু বৰপেটা–বিশ্বনাথ–কাছাৰ হাছাও–হোজাই–কোকৰাঝাৰত এজনকৈ লোকৰ ক’ভিডত মৃত্যু ঘটিছে৷