নিয়মীয়া বাৰ্তা, ৫ মেঃ লকডাউনৰ মাজতে জামুগুৰিহাটৰ দক্ষিণ–পশ্চিম প্রান্তৰ লুঙি বজাৰত এজন আৰক্ষী জোৱানে এগৰাকী কিশোৰীক ধর্ষণ কৰা ঘটনাই অঞ্চলজুৰি তীব্র চাঞ্চল্যৰ সৃষ্টি কৰিছে৷ ধর্ষিতা কিশোৰীগৰাকীৰ পৰিয়ালে জামুগুৰি থানাত দাখিল কৰা এজাহাৰ অনুসৰি কালি সন্ধিয়াৰ ভাগত অঞ্চলটোৰ লুঙি বজাৰত থকা জামুগুৰি আৰক্ষী থানাৰ অস্থায়ী শিবিৰৰ জোৱান ফুলেন ডেকাই কিশোৰীগৰাকীক ফুচুলাই নি লুঙি বজাৰৰ সমীপত ধর্ষণ কৰে৷ প্রথম অৱস্থাত ছলাহী কথাৰে কিশোৰীগৰাকীক ১১নং বেটেলিয়নৰ জোৱানজনে নির্জন স্থানলৈ লৈ যায় আৰু তাতে ধর্ষণ কৰে৷
পিছত কিশোৰীগৰাকীয়ে ঘৰলৈ গৈ পৰিয়ালৰ লোকৰ আগত এই সমস্ত কথা জনায়৷ পৰিয়ালৰ ফালৰ পৰা জামুগুৰি থানাত এজাহাৰ দাখিল কৰে৷ আজি পুৱা জামুগুৰি আৰক্ষী ঘটনাস্থলীত উপস্থিত হৈ অভিযুক্ত জোৱানজনক গ্রেপ্তাৰ কৰি জামুগুৰি থানালৈ লৈ অহাৰ লগতে ধর্ষিতা কিশোৰীগৰাকীক স্বাস্থ্য পৰীক্ষাৰ বাবে তেজপুৰলৈ প্রেৰণ কৰে৷ ঘটনা সন্দর্ভত জামুগুৰি আৰক্ষীয়ে তদন্ত অব্যাহত ৰাখিছে৷