নিয়মীয়া বাৰ্তা, ১৭ ফেব্ৰুৱাৰীঃ কংগ্রেছৰ হৈ নির্বাচনী প্রচাৰ চলোৱাৰ বাবে অহা ২৪ ফেব্রুৱাৰীত অসম ভ্রমণলৈ আহিব কংগ্রেছ নেত্রী প্রিয়ংকা গান্ধী৷ প্রিয়ংকা গান্ধীয়ে সেইদিনা তেজপুৰত এক নির্বাচনী জনসভাত অংশগ্রহণ কৰিব৷ প্রদেশ কংগ্রেছৰ এক সূত্রই জানিবলৈ দিয়া মতে, কংগ্রেছ নেতা ৰাহুল গান্ধী পুনৰ অসম ভ্রমণলৈ আহিব৷ ৰাহুল গান্ধী আৰু প্রিয়ংকা গান্ধীক লৈ প্রদেশ কংগ্রেছে বৰাক উপত্যকা, উত্তৰ অসম আৰু নামনি অসমত এই মাহৰ ভিতৰতে কমেও তিনিখন জনসভা অনুষ্ঠিত কৰাৰ পৰিকল্পনা কৰিছে৷ অচিৰেই তেওঁলোকৰ ভ্রমণসূচীৰ দিন–তাৰিখ প্রকাশ পোৱাৰ সম্ভাৱনা আছে৷
ইপিনে ৰাজ্যখনৰ জনসাধাৰণৰ সমস্যাসমূহ দাঙি ধৰাৰ বাবে প্রদেশ কংগ্রেছে অসম বচাওঁ আহক নামে এক অনলাইন ভিডিঅ’ প্রতিযোগিতাৰ আয়োজন কৰে৷ যোৱা ১০ ফেব্রুৱাৰীত গুৱাহাটীৰ ৰাজীৱ ভৱনৰ পৰা এই অভিযানৰ শুভাৰম্ভ কৰে৷ সমাজৰ সকলো শ্রেণীৰ দল–মত নির্বিশেষে ৰাইজৰ বাবে মুকলি কৰা এই অভিযানত অংশগ্রহণ কৰা প্রথমটো দলৰ বিজয়ীসকলৰ নাম আজি প্রদেশ কংগ্রেছে ঘোষণা কৰে৷
গুৱাহাটীৰ খানাপাৰাৰ ২৩ বছৰীয়া মনস্বিতা মহন্তই প্রথম পুৰস্কাৰ হিচাপে আইফোন–১২ ম’বাইল লাভ কৰিছে৷ আইআইটি গুৱাহাটীৰ ছাত্র অভিনৱ বৰাই দ্বিতীয় পুৰস্কাৰ হিচাপে ৱানপ্লাছ ম’বাইল আৰু শিৱসাগৰ জিলাৰ ইয়ান বাণ্টাৱা আৰু টি এন প্রাণে তেওঁলোকৰ ভিডিঅ’ৰ বাবে নগদ পুৰস্কাৰ লাভ কৰিছে৷ কংগ্রেছৰ ইস্তাহাৰ কমিটীৰ অধ্যক্ষ গৌৰৱ গগৈয়ে ভিডিঅ’কলৰ জৰিয়তে বিজয়ীসকলক অভিনন্দন জনাই কয় যে তেওঁলোকে ৰাজ্যখনক জর্জৰিত কৰা প্রাসংগিক সমস্যাবোৰৰ ওপৰত আলোকপাত কৰিছে৷ তেওঁলোকৰ প্রচেষ্টাই অসমক ৰক্ষা কৰাত যথেষ্ট সহায় কৰিব৷ প্রদেশ কংগ্রেছৰ সভাপতি ৰিপুণ বৰা, কংগ্রেছ বিধায়িনী দলৰ নেতা দেৱব্রত শইকীয়া, নির্বাচনী প্রচাৰ কমিটীৰ অধ্যক্ষ প্রদ্যুৎ বৰদলৈ, মিডিয়া আৰু যোগাযোগ কমিটীৰ অধ্যক্ষ আব্দুল খালেকেও প্রতিযোগিতাখনৰ বিজয়ীসকলক অভিনন্দন জনায়৷
উল্লেখ্য যে অসম বচাওঁ আহক ভিডিঅ’ প্রতিযোগিতাত এতিয়ালৈ ১০ হাজাৰৰো অধিক লোকে ৰাজ্যখনৰ বিভিন্ন সমস্যাৰ ওপৰত আলোকপাত কৰিছে৷ অনাগত দিনত এই সংখ্যা এক লাখৰো অধিক হোৱাৰ আশা কৰিছে৷