নিয়মীয়া বাৰ্তা, ২০ ছেপ্টেম্বৰঃ নৱগঠিত আঞ্চলিক ৰাজনৈতিক দল অসম জাতীয় পৰিষদে (অজাপ) পূর্ণোদ্যমে ৰাজনৈতিক কুচকাৱাজ আৰম্ভ কৰাৰ বিপৰীতে নিষ্প্রভ হৈ ৰৈছে চৰকাৰৰ অংশীদাৰ আঞ্চলিক দল অসম গণ পৰিষদ৷
অগপৰ সভাপতিগৰাকীৰ নির্বাচন প্রক্রিয়া আইনী মেৰপেঁচত সোমাই পৰাৰ ফলত দলটোৰ সকলো ধৰণৰ ৰাজনৈতিক কাম–কাজ স্থবিৰ হৈ পৰিছে৷ ইয়াৰ বিপৰীতে আঞ্চলিকতাবাদত বিশ্বাসী জনসাধাৰণৰ সমর্থন আদায়ৰ বাবে ব্যাপক তৎপৰতা চলাইছে অসম জাতীয় পৰিষদে৷
অগপৰ তৃণমূল পর্যায়ৰ নেতা–কর্মীসকলৰ সৈতে অসম জাতীয় পৰিষদৰ নেতৃবর্গই ধাৰাবাহিক যোগাযোগ অব্যাহত ৰাখিছে৷ দলে–বলে অগপৰ বহু বুথ আৰু আঞ্চলিক সমিতিয়ে নতুন দলটোত যোগ দিয়াৰ প্রস্তুতি চলোৱাৰ সমান্তৰালভাৱে কেইবাটাও সৰু–বৰ দলে অজাপত চামিল হোৱাৰ বাবেও সন্মতি প্রদান কৰিছে৷ এই প্রক্রিয়া আৰম্ভ হৈছে আজিৰ পৰা৷ পৰৱর্তী সময়ত আৰু কেইবাটাও ক্ষুদ্র আঞ্চলিক দল সদৌ অসম ছাত্র সন্থা আৰু অসম জাতীয়তাবাদী যুৱ–ছাত্র পৰিষদৰ উদ্যোগত গঠন হোৱা দলটোত চামিল হোৱাৰ প্রবল সম্ভাৱনা আছে৷
এইদৰে ভূমিষ্ঠ হোৱাৰ পিছতে অজাপই ৰাজ্যৰ গাঁৱে–ভূঞে তীব্র গতিত সাংগঠনিক অভিযান আৰম্ভ কৰিছে৷ একে সময়তে নতুন দলটোৰ কেন্দ্রীয় সমিতি গঠনক লৈও ব্যাপক চর্চা আৰম্ভ হৈছে৷ দলটোৰ সভাপতি হিচাপে দায়িত্ব প্রদান কৰা হ’ব অসমৰ সমাজ জীৱনৰ নিকা ভাবমূর্তিৰ কোনো এগৰাকী পৰিচিত ব্যক্তিক৷ একে সময়তে শাসক–বিৰোধীৰ কেইবাগৰাকীও জ্যেষ্ঠ নেতায়ো অজাপত শীঘ্রে যোগদান কৰিব৷
নৱগঠিত আঞ্চলিক দলটোৰ এনে তৎপৰতাৰ বিপৰীতে অসম আন্দোলনৰ গর্ভৰ পৰা জন্মলাভ কৰা অসম গণ পৰিষদৰ শেহতীয়া কাম–কাজে বিতুষ্ট কৰি তুলিছে দলৰ বহু নেতা–কর্মীক৷ আইনী মেৰপাকত নেতৃত্বহীন হৈ পৰা অগপই আকৌ এবাৰ বিজেপিৰে মিত্রতাত আবদ্ধ হোৱাটো নিশ্চিত৷ কিন্তু ৰাজ্যত এতিয়া অসম গণ পৰিষদৰ গণভিত্তিও শূন্যপ্রায়৷
বহুকেইগৰাকী বিধায়ক নিজ নিজ সমষ্টিত প্রবল গণৰোষৰ সন্মুখীন হৈছে৷ সমাগত নির্বাচনত তেওঁলোক পৰাজয়ৰ সন্মুখীন হোৱাটো প্রায় নিশ্চিত হৈ পৰিছে৷ গতিকে অগপক এই সমষ্টিসমূহ কোনো পৰিস্থিতিতে এৰি দিব বিচৰা নাই বিজেপিয়ে৷ ২০২১ চনৰ নির্বাচনত খুব কমসংখ্যক সমষ্টিহে অগপই লাভ কৰিব৷ স্বাভাৱিকতে এই সম্ভাৱনা সন্মুখত দেখি যুৱ নেতাসকলে দল এৰিবলৈ একপ্রকাৰ সাজু হৈছে৷
এনে প্রতিকূল ৰাজনৈতিক পৰিৱেশৰ মাজতো মন্ত্রিত্ব উপভোগ কৰি থকা দলৰ জ্যেষ্ঠ নেতাসকলৰ কিছু কর্মকাণ্ড কৌতুকৰ বিষয় হৈ পৰিছে৷ শেহতীয়াকৈ অগপই যুগৰ লগত খাপ খোৱাকৈ ছ’চিয়েল মিডিয়াত গুৰুত্ব দিয়াৰ কথা ঘোষণা কৰিছিল৷ সেইমতেই মন্ত্রী–বিধায়কসকলৰ লগতে দলৰ নামতো ফেচবুক পেজ মুকলি কৰা হৈছিল৷
ইয়াৰ উদ্দেশ্য এটাই আছিল– ছ’চিয়েল মিডিয়া ব্যৱহাৰকাৰীসকলক্ অগপৰ প্রতি আকর্ষিত কৰা৷ কিন্তু তাকে কৰিবলৈ গৈ অসম গণ পৰিষদ দলৰ তৰফৰ পৰা এনে কেতবোৰ বিষয় ফেচবুকৰ জৰিয়তে প্রচাৰ কৰিছে, যাক দেখি নহঁহাকৈ থাকিব নোৱাৰি৷ আজি অগপৰ ফেচবুক পেজত প্রকাশিত দুটা বিষয় আছিল চাওলুং চুকাফাৰ অসম আগমন আৰু অর্জুন গছৰ উপকাৰিতা৷
এটা ফেচবুক পোষ্টত উল্লেখ কৰা হৈছে এনেদৰে– ‘অর্জুন গছৰ পাত, ছাল, শিপা হূৎপিণ্ডৰ মহৌষধ৷ অর্জুন গছৰ ছালৰ গুড়িৰ লগত খেজুৰ মিহলাই খালে উপকাৰী প্রমাণিত হয়৷’ একেদৰে ১৭ ছেপ্টেম্বৰত প্রচাৰ কৰা এটা ফেচবুক পোষ্ট আছিল ‘পচতি উৎসৱ’ সম্পর্কীয়৷ ১৬ ছেপ্টেম্বৰত অসম গণ পৰিষদ দলৰ তৰফৰ পৰা ক’ৰোনাৰ পৰা বাচিবলৈ গৰম পানীৰ ভাপ ল’বলৈ পৰামর্শ প্রদান কৰা হৈছে৷
১৪ ছেপ্ঢেম্বৰৰ দিনা ‘চি ভিটামিন’ৰ বাবে আমলখিৰ উপকাৰিতা সন্দর্ভত অগপই প্রচাৰ কৰিছে৷ একেদৰে ১১ ছেপ্টেম্বৰৰ দিনা দলটোৰ এটা ফেচবুক পোষ্টৰ বিষয় আছিল জ্বৰ, পানীলগাত মাটিকঁঠালৰ উপকাৰিতা৷ এয়াই হৈছে অসম গণ পৰিষদ দলটোৰ শেহতীয়া ‘ৰাজনৈতিক’ গতিবিধি৷
দলটোৰ ৰাজনৈতিক দর্শন, কর্মসূচীৰ জৰিয়তে ৰাইজক আকর্ষণ কৰাৰ সলনি আমলখি, মাটিকঁঠালৰ উপকাৰিতা প্রচাৰৰ ‘ৰণনীতি’য়ে বহু যুৱ আৰু নিষ্ঠাৱান কর্মীক অতিষ্ঠ কৰি তুলিছে৷ সেয়ে আঞ্চলিকতাবাদী ৰাজনীতিত নৱ–উন্মেষ ঘটা ‘অসম জাতীয় পৰিষদ’ৰ প্রতি ধাৱমান হৈছে অগপৰ নবীন–প্রবীণ নেতা–কর্মীসকল৷ স্বাভাৱিকতে নৱোদিত অজাপৰ সন্মুখত তেনেই স্তিমিত হৈ পৰিছে চৰকাৰৰ অংশীদাৰ দল অসম গণ পৰিষদ৷