নিয়মীয়া বাৰ্তা ১২ জুনঃ নগাঁও জিলাৰ পুৰণিগুদামৰ জলাহৰচুকৰ পথাৰত আজি পুৱাই এটি আঘাতপ্ৰাপ্ত ধনেশ পক্ষী উদ্ধাৰ কৰাক কেন্দ্ৰ কৰি সমগ্ৰ অঞ্চল জুৰি ৰাইজৰ মাজত সৃষ্টি ব্যাপক উৎকণ্ঠাৰ। স্থানীয় এজন লোকে পুৱাৰ ভাগতে পথাৰ খনৰ পানীত পৰি চৰাইটোৱে চটফটাই থকা প্ৰত্যক্ষ কৰি খবৰ দিয়ে চাপানালাৰ প্ৰকৃতিপ্ৰেমী যুৱক বিনোদ দুলু বৰাক। বন বিভাগৰ উপস্থিতত ততাতৈয়াকৈ দুলু বৰায়ে আঘাতপ্ৰাপ্ত ৰজাধনেশটো উদ্ধাৰ কৰি প্ৰাথমিক চিকিৎসা প্ৰদান কৰাৰ অন্তত কাজিৰঙাস্থিত বন্যপ্ৰাণী চিকিৎসা কেন্দ্ৰলৈ প্ৰেৰণৰ দিহা কৰা দেখা যায়। উদ্ধাৰ হোৱা ৰজাধনেশটোৰ ডেউকাত আঘাতৰ চিন স্পষ্ট হৈ আছে, যাৰ বাবেই হয়তো উৰিবলৈ অসক্ষম হৈছেল ৰজাধনেশটো।
উল্লেখযোগ্য যে, বৰ্তমান হৈছে ধনেশ পক্ষীৰ বাহ বনোৱা অথবা কণী ওমণি দি পোৱালি জগোৱাৰ সময়। এই সময়খিনিত স্বাভাবিকতে মতা ধনেশ পক্ষীটোয়ে আহাৰ যোগান ধৰে বাহত থকা মাইকী ধনেশ পক্ষীজনীক। গতিকে বিনোদ দুলু বৰায়ে ৰাজধনেশটো উদ্ধাৰ কৰাৰ লগতে সমগ্ৰ বিষয়টোৰ ওপৰত স্থানীয় ৰাইজক সজাগ কৰাৰ লগতে ওচৰেপাজৰে অঞ্চলত বাহত থকা মাইকী ধনেশ পক্ষীজনীৰ সন্ধান পালে লগে লগে বিনোদ দুলু বৰা তথা বন বিভাগক অৱগত কৰিবলৈ অনুৰোধ জনাই যাতে মাইকী পক্ষীজনীক বাহতে পৰ্য্যাপ্ত আহাৰৰ যোগান ধৰিব পৰা যায়।