নিয়মীয়া বাৰ্তা, ১০ এপ্ৰিলঃ আন্তঃৰাষ্ট্রীয় বজাৰত খাৰুৱা তেলৰ মূল্যবৃদ্ধি আৰু ৰাছিয়া–ইউক্রেইনৰ যুদ্ধৰ বাবেই পেট্র’ল–ডিজেলৰ দাম বৃদ্ধি হৈছে৷ আন্তঃৰাষ্ট্রীয় বজাৰত দাম কমিলেই অসমতো পেট্র’ল–ডিজেলৰ দাম হ্রাস পাব৷ –এই মন্তব্য কেন্দ্রীয় পেট্র’লিয়াম দপ্তৰৰ ৰাজ্যমন্ত্রী ৰামেশ্বৰ তেলীৰ৷
দিছপুৰত সংবাদ মাধ্যমৰ আগত কেন্দ্রীয় মন্ত্রী তেলীয়ে কয় যে ভাৰতত পেট্র’ল–ডিজেলৰ দাম মূলতঃ ইণ্ডিয়ান অইল, ভাৰত পেট্র’লিয়াম আৰু হিন্দুস্তান পেট্র’লিয়াম কোম্পানী তিনিটাই নিজে নির্ধাৰণ কৰে৷ আন্তঃৰাষ্ট্রীয় বজাৰতো খাৰুৱা তেলৰ দাম বৃদ্ধিৰ বাবে পেট্র’ল–ডিজেলৰ দাম বাঢ়িছে৷ মন্ত্রী তেলীয়ে আৰু কয় যে ভাৰতত পেট্র’ল–ডিজেলৰ আটাইতকৈ বেছি দাম হৈছে ৰাজস্থানত৷ ৰাজস্থানতকৈ চুবুৰীয়া হাৰিয়ানাত পেট্র’ল–ডিজেলৰ দাম ১৫ টকা কম৷ অলপতে তেওঁ নিজেই ৰাজস্থানলৈ গৈ ৰাজস্থান চৰকাৰক পেট্র’ল–ডিজেলৰ দাম সমান কৰিব কৈছে৷ কাৰণ দামৰ এনে তাৰতম্যৰ বাবে ৰাজস্থানত পেট্র’ল–ডিজেলৰ বিক্রী কমিছে আৰু হাৰিয়ানাত বিক্রী বাঢ়িছে৷ বিজেপিশাসিত ৰাজ্যসমূহত ৰাজ্যিক কৰ কমাই দিয়া হৈছে৷ তদুপৰি কেন্দ্রীয় কৰো ১০ টকা আৰু ৫ টকাকৈ কমাই দিয়া হৈছে৷ কিন্তু অ–বিজেপিশাসিত বহু ৰাজ্যই এতিয়াও ৰাজ্যিক কৰ কমাই দিয়া নাই৷ আনহাতে, ৰাছিয়া–ইউক্রেইনৰ যুদ্ধৰ বাবেও পেট্র’ল–ডিজেলৰ দাম বৃদ্ধি পাইছে৷ সেই যুদ্ধৰ বাবে বহু দেশ পেট্র’ল–ডিজেলৰ দামক লৈ ভুক্তভোগী হৈছে৷ মন্ত্রী তেলীৰ মতে, আন্তঃৰাষ্ট্রীয় বজাৰত পেট্র’ল–ডিজেলৰ দাম কমিলেই ভাৰতৰ লগতে অসমতো পেট্র’ল–ডিজেলৰ দাম কমিব৷