নিয়মীয়া বাৰ্তা, ১১ ডিচেম্বৰ: আজি ঘোষিত হ’ব চলিত বর্ষৰ উচ্চতৰ মাধ্যমিক শিক্ষান্ত পৰীক্ষা (বিশেষ)ৰ ফলাফল৷ অসম উচ্চতৰ মাধ্যমিক শিক্ষা সংসদে এই কথা সদৰী কৰিছে৷ সংসদৰ পৰীক্ষা নিয়ন্ত্রক পংকজ বৰঠাকুৰে জানিবলৈ দিয়া মতে, আজি দিনৰ ১২ বজাত ঘোষণা কৰিবলগীয়া ফলাফলসমূহ সংসদৰ অধীনস্থ সকলো শিক্ষানুষ্ঠানলৈ ই–মেইলযোগে প্রেৰণ কৰা হ’ব৷ তদুপৰি ছাত্র–ছাত্রীসকলে সংসদৰ ৱেবছাইট www.ahsec.assam.gov.in’ত ফলাফল চাব পাৰিব৷ উল্লেখ্য যে যোৱা ১০ অক্টোবৰৰ পৰা ১১ নৱেম্বৰলৈ উচ্চতৰ মাধ্যমিক শিক্ষান্ত পৰীক্ষা (বিশেষ) অনুষ্ঠিত হৈছিল৷ এই পৰীক্ষাৰ বাবে ২,০৮২জন শিক্ষার্থীয়ে আবেদন কৰিলেও অৱতীর্ণ হৈছিল ১,৪১৪জনেহে৷