নিয়মীয়া বাৰ্তা ৩১ ডিচেম্বৰঃ বৃহস্পতিবাৰে নতুন দিল্লীৰ ৰবীন্দ্র ভৱনত ২০২০ বর্ষৰ সাহিত্য অকাডেমি অনুবাদ বঁটা আনুষ্ঠানিকভাৱে প্রদান কৰা হয় দিগন্ত বিশ্ব শর্মাক৷ ক’ভিড প্রট’কলৰ বাবে অনুষ্টুপীয়াকৈ আয়োজিত অনুষ্ঠানত শর্মাক বঁটা প্রদান কৰে সাহিত্য অকাডেমিৰ অধ্যক্ষ চন্দ্রশেখৰ কাম্বাৰাই৷
জানিব পৰা মতে, আজি বঁটাপ্রাপকসকলৰ মাজত এক মত বিনিময় অনুষ্ঠানৰ আয়োজন কৰিছে সাহিত্য অকাডেমিয়ে৷ এই অনুষ্ঠানতে বঁটাপ্রাপকসকলে বক্তব্য ৰাখিব৷ উল্লেখ্য যে সাহিত্য অকাডেমিয়ে ২০২০ বর্ষৰ অনুবাদ বঁটাপ্রাপকসকলৰ নাম যোৱা ১৮ ছেপ্টেম্বৰত আনুষ্ঠানিকভাৱে ঘোষণা কৰিছিল৷ শ্রীৰবিন্দৰ ‘ৰেইনেইচেঞ্চ ইন ইণ্ডিয়া এণ্ড আদাৰ এছেজ অন ইণ্ডিয়া কালচাৰ’ শীর্ষক গ্রন্থখন ‘ভাৰতীয় সংস্কৃতিৰ ভিত্তি’ নামেৰে অসমীয়ালৈ অনুবাদ কৰাৰ বাবে শর্মাক এই বঁটাৰ বাবে নির্বাচিত কৰিছিল৷ অসমৰ আন এজন সাহিত্যিক কামেশ্বৰ ব্রহ্ময়ো বড়ো ভাষাৰ বাবে সাহিত্য অকাডেমি অনুবাদ বঁটাৰ বাবে নির্বাচিত হৈছিল৷