নিয়মীয়া বাৰ্তা ১ নৱেম্বৰঃ অভিযানত দেখুওৱা পাৰদর্শিতাৰ বাবে কেন্দ্রীয় গৃহ মন্ত্রালয়ৰ স্বীকৃতি লাভ কৰিলে অসমীয়া আই পি এছ বিষয়া শংকৰব্রত ৰায়মেধিয়ে৷ ৰাষ্ট্রীয় অনুসন্ধানকাৰী সংস্থা, চমুকৈ ‘নিয়া’ৰ নতুন দিল্লীস্থিত কার্যালয়ত আৰক্ষী অধীক্ষক ৰূপে কর্মৰত ৰায়মেধিলৈ আগবঢ়োৱা হৈছে চলিত বর্ষৰ কেন্দ্রীয় গৃহমন্ত্রীৰ বিশেষ অভিযান পদক৷ ২০২০ চনৰ মার্চ মাহৰ পৰা চলিত বর্ষৰ আগষ্ট মাহৰ ভিতৰত ৰায়মেধিয়ে কুখ্যাত সন্ত্রাসবাদী সংগঠন ইছলামিক ষ্টেট (আই এছ)ৰ বিৰুদ্ধে চলোৱা সফল অভিযানৰ বাবেই তেওঁক এই পদক আগবঢ়োৱা হৈছে৷ উল্লেখ্য যে ‘নিয়া’ৰ মুঠ ১৬জন বিষয়াক চলিত বর্ষৰ কেন্দ্রীয় গৃহমন্ত্রীৰ বিশেষ অভিযান পদকৰ বাবে নির্বাচিত কৰিছে৷ ইয়াৰ ভিতৰত অসমীয়া আই পি এছ বিষয়া ৰায়মেধি অন্যতম৷