আজিৰে পৰা শ্রীমন্ত শংকৰদেৱ সংঘৰ ৯১সংখ্যক অধিৱেশনঃ বাগ্মীবৰ নীলমণি ফুকন ক্ষেত্রৰ চৌদিশে হৰিনামৰ ধ্বনি

নিয়মীয়া বাৰ্তা, ২৫ ফেব্ৰুৱাৰীঃ আজিৰে পৰা বহু প্রত্যাশিত শ্রীমন্ত শংকৰদেৱ সংঘৰ ৯১সংখ্যক অধিৱেশন৷ নাহৰকটীয়াৰ ৰাঙলীপথাৰ–কলিয়াপ্ নির্মাণ কৰি উলিওৱা ১৬শ বিঘা মাটিকালি ব্যাপ্ত বাগ্মীবৰ নীলমণি ফুকন ক্ষেত্রত এতিয়া চৌদিশে হৰিনাম ধ্বনি৷ সমগ্র উত্তৰ–পূবৰ ভিতৰতে বৃহৎ ধর্মীয় তথা সামাজিক সংগঠন শ্রীমন্ত শংকৰদেৱ সংঘৰ ৯১সংখ্যক মূল অধিৱেশনস্থলীলৈ ইতিমধ্যে ৰাজ্যৰ ভিন্ন প্রান্তৰ ভকত–বৈষৱৰ আগমণ আৰম্ভ হৈছে৷ সকলোৰে এতিয়া একমাত্র প্রার্থনা গোমা বতৰৰ প্রচ্ছায়া আঁতৰি যেন ভালে–কুশলে পৰিসমাপ্তি ঘটে প্রায় দুটা বছৰ বিৰতিত অনুষ্ঠিত হোৱা নাহৰকটীয়া অধিৱেশনৰ৷

উল্লেখ্য যে ক’ৰোনাকালীন পৰিস্থিতিৰ বাবে নাহৰকটীয়াত অনুষ্ঠিতব্য অধিৱেশনখনক লৈও বিগত ১০ ফেব্রুৱাৰী পর্যন্ত অনিশ্চয়তা আছিল৷ অৱশ্যে সময় আগবঢ়াৰ লগে লগেই অধিৱেশনৰ কাম–কাজো আগবাঢ়ে আৰু অৱশেষত মূল অধিৱেশন আৰম্ভ হোৱাৰ সময়ো নিচেই সন্নিকট৷ বৃহস্পতিবাৰে বিপুল উছাহেৰে ভকত–বৈষৱে বাগ্মীবৰ নীলমণি ফুকন ক্ষেত্রত স্থাপন কৰা নামঘৰলৈ কঢ়িয়াই আনে ভাগৱত সমন্বিতে ধর্মধ্বজা৷  ইফালে আয়োজক মণ্ডলীৰ ব্যস্ততাৰ মাজতেহ অধিৱেশনস্থলীৰ নিৰাপত্তাৰ দায়িত্ব কালিৰে পৰা চমজি লৈছে ৪০০ আৰক্ষীৰ লোকে৷ সাতগৰাকী উপ–আৰক্ষী অধীক্ষকৰ নিয়ন্ত্রণত থাকিবলগীয়া এই বিশাল আৰক্ষী বাহিনীত আছে ২০গৰাকী পৰিদর্শক আৰু ৪০গৰাকী উপ–পৰিদর্শক পর্যায়ৰ বিষয়া৷ আনহাতে, আৰক্ষী বাহিনীটোত আছে ৬০ মহিলা আৰক্ষীও৷ অধিৱেশনস্থলীৰ আৰক্ষী নিয়ন্ত্রণ কক্ষত অহর্নিশে থাকিবলগীয়া আৰক্ষী বাহিনীক সহায়ৰ বাবে থাকিব ৫০০ গাঁওৰক্ষী বাহিনীৰ সদস্য৷ ইয়াৰ উপৰি আছে খোদ শংকৰদেৱ সংঘৰ দহ সহস্রাধিক সেৱা বাহিনীৰ সদস্য৷