নিয়মীয়া বাৰ্তা, ২৮ ছেপ্টেম্বৰঃ অসম সচিবালয়ত কর্মৰত এগৰাকী কর্মচাৰীয়ে আত্মহননৰ পথ বাছি লোৱাক কেন্দ্র কৰি ৰহস্যৰ সৃষ্টি হৈছে৷ মহানগৰীৰ জৱাহৰ নগৰ হাউছিং কলনীত আত্মহত্যা কৰা সচিবালয়ৰ এই কর্মচাৰীজন হ’ল বিবেক দাস৷ তেওঁ সোমবাৰে বৰপেটাৰ নিজ ঘৰৰ পৰা আহিয়েই আত্মহত্যাৰ পথ বাছি লয়৷ পাছত নিজ আৱাসৰ বন্ধ কোঠাত চিপ লোৱা অৱস্থাত উদ্ধাৰ হয় দাসৰ মৃতদেহ৷
অসম সচিবালয়ৰ সাধাৰণ প্রশাসন বিভাগত জ্যেষ্ঠ সহায়ক হিচাপে কাম কৰা দাসে মৃত্যুৰ পূর্বে এখন ছুইচাইড নোট লিখি থৈ গৈছে৷ এই ছুইচাইড নোটখন উদ্ধাৰ হোৱাৰ পাছতে দুটা কণমানি সন্তানৰ পিতৃ দাসৰ আত্মহত্যাক লৈ ৰহস্য অধিক গাঢ় হৈ পৰিছে৷ কিয়নো ছুইচাইড নোটখনত অন্যৰ ভুলৰ বাবে তেওঁ জবাবদিহি হ’বলগীয়া হোৱাৰ কথা উল্লেখ কৰিছে দাসে৷
কর্মচাৰীজনে ছুইচাইড নোটত তেওঁ কেতিয়াও ভুল কৰা নাই বুলি উল্লেখ কৰি লিখিছে– মই কাম চোৰ নহয়৷ বেছিকৈ কাম কৰি মোৰ ভুল হোৱা বুলি ভাব হৈছে৷ যোৱা কিছুদিন ধৰি বিবেক দংশন হৈ আছে৷ অকুপেণ্ট কণ্ট্ৰেকটৰ সকলোকে হেল্প কৰি গৈছিলোঁ যোৱা চাৰি বছৰে৷ এফ এ যোৱাবছৰ কিবা ভুল কৰি এতিয়া যেন মইহে জবাবদিহি হ’বলগা হৈছে৷ মই চম্ভালিব নোৱাৰিলোঁ৷ নিজৰ মান–সন্মানৰ কাৰণে সকলোকে ছার্ভিচ দিব চেষ্টা কৰাটো মোৰ দোষ হ’ব নোৱাৰে৷ দোষ যদি সকলোবোৰৰ এটা বিচাৰ হ’ব লাগিব৷ শেষত মোৰ কণমানি ছোৱালীজনীৰ কাৰণে অজস্র মৰম আৰু মা, নৱনীতাক ছ’ৰী ক’লোঁ৷ মোৰ বিশ্বাস মোৰ নামত অফিচিয়েল কামত আজিলৈকে যিমান আহিছে, সকলোৱে মোৰ ৰেছপণ্ড এণ্ড বিহেভিয়াৰ দেখিছে৷ মোৰ কাৰণে অথৰিটী এমবেলেঞ্চমেণ্ট হোৱাটো মই নিবিচাৰোঁ৷ মই কিন্তু উইডআউট মেলাফাইট ইনটেনচন কামখিনি ক্লীয়াৰ কৰিব চেষ্টা কৰিছিলোঁ৷
আৰক্ষীয়ে ঘটনা সন্দর্ভত ইতিমধ্যে তদন্ত আৰম্ভ কৰিছে৷ আত্মীয় তথা সতীর্থ একাংশ কর্মচাৰীয়ে জানিবলৈ দিয়া মতে এটি ৪–৫ বছৰীয়া কন্যা আৰু এটা এবছৰীয়া সন্তান আছিল৷ পৰিয়ালৰ একমাত্র উপার্জনকাৰী দাসে দুই সন্তানৰ উপৰি মাতৃ আৰু পত্নীক ইহসংসাৰত এৰি থৈ গৈছে৷