নিয়মীয়া বার্তা, ৩০ জুনঃ নেৰানেপেৰা বৰষুণৰ ফলত হোৱা ভয়াৱহ কৃত্রিম বানৰ কবলত ককবকাইছে ডিব্রুগড় চহৰবাসীয়ে৷ শেহতীয়াকৈ হোৱা বানৰ ফলত ঘৰ–বাৰী এৰি আশ্রয় শিবিৰত আশ্রয় ল’বলগীয়া হৈছে বহুসংখ্যক লোকে৷ কৃত্রিম বানত নষ্ট হৈছে চহৰবাসীৰ সা–সম্পদ৷ দীর্ঘদিন ধৰি চহৰখনত পানী নিষ্কাশনৰ বাবে সুপৰিকল্পিত ব্যৱস্থা গ্রহণ নকৰা বাবেই এই ভয়াৱহ বান পৰিস্থিতি সৃষ্টি হোৱা বুলি প্রকাশ কৰিছে ডিব্রুগড়বাসীয়ে৷ বিগত সময়ছোৱাত চহৰখনৰ নলা–নর্দমাৰ খনন, পৰিবর্ধন আৰু পকীকৰণৰ ক্ষেত্রত প্রশাসনে কৰি অহা চূড়ান্ত অৱহেলাৰ বাবেই কৃত্রিম বানে ভয়াৱহ ৰূপ ধাৰণ কৰিছে৷
শেহতীয়াকৈ ডিব্রুগড়ত নলা–নর্দমা নির্মাণৰ বাবে কেইবাটাও প্রকল্প গ্রহণ কৰা হৈছিল যদিও আজি পর্যন্ত এই প্রকল্পসমূহৰ নির্মাণকার্য সম্পূর্ণ নহ’ল৷ বিগত কংগ্রেছ চৰকাৰৰ দিনতে ডিব্রুগড়ত মুখ্য সুৰক্ষা নলাৰ খনন, সংবর্ধন আৰু পকীকৰণৰ বাবে কে কে স্পান নামৰ এটা স্পেনিছ কোম্পানীক দায়িত্ব দিয়া হৈছিল৷ ২০১৭ চনত মাত্র ১৩ শতাংশ কাম কৰিয়েই কোম্পানীটো উধাও হয়৷ ইয়াৰ পাছত বদ্রি এণ্ড কোম্পানী আৰু গেনন দংকাৰলে কোম্পানীক দায়িত্ব প্রদান কৰা হয়৷ বিগত বর্ষৰ আৰম্ভণিতে এই কোম্পানী দুটাক দায়িত্ব দিয়া হৈছিল৷ অসম নগৰ আন্তঃগাঁথনি উন্নয়ন খণ্ডৰ অধীনত ৯.৫ কিলোমিটাৰ দৈর্ঘ্যৰ সুৰক্ষা নলাটোৰ ৪.৫ কিলোমিটাৰ নির্মাণৰ কামৰ বদ্রি এণ্ড কোম্পানীক দায়িত্ব দিয়া হৈছিল৷
কিন্তু পৰিতাপৰ কথা এয়ে যে আজিপর্যন্ত চহৰৰ মূল অংশৰ কাম–কাজ আৰম্ভই নহ’ল৷ একেদৰে চহৰখনৰ লালুকা গাঁৱৰ পৰা বৰপথাৰৰ হাতকটা কোঁৱৰ গাঁৱলৈকে মুঠ ৪.৫ কিলোমিটাৰ দৈর্ঘ্যৰ সুৰক্ষা নলাটোৰ খনন আৰু পকীকৰণৰ দায়িত্ব এই কোম্পানীটোক অর্পণ কৰা হৈছে৷ মুঠ ৮৪ কোটি টকা ব্যয় সাপেক্ষে নির্মাণ কৰিবলগীয়া এই নলাটোৰ কাম প্রথম অৱস্থাত খুব সুন্দৰভাৱেই আগবঢ়াই নিছিল কোম্পানীটোৱে৷ কিন্তু দিন বাগৰাৰ লগে লগে নির্মাণকার্যত চূড়ান্ত গাফিলতি আৰম্ভ হয়৷ ইয়াৰ সমান্তৰালভাৱে জি ডি চি এল আৰু বদ্রি এণ্ড কোম্পানীক ডিব্রুগড়ৰ আন কেইবাটাও নলা–নর্দমা নির্মাণৰ দায়িত্ব অর্পণ কৰা হয়৷
কিন্তু কোম্পানী দুটাই ব্যাপক বিসংগতিপূর্ণভাৱে এই নলা–নর্দমাসমূহ নির্মাণ কৰা বুলি একাংশই অভিযোগ উত্থাপন কৰিছে৷ ইফালে, হাতকটা কোঁৱৰ গাঁৱৰ পৰা মধুপুৰ শ্লুইছ গেটলৈকে ১৫.৮ কিলোমিটাৰ দৈর্ঘ্যৰ নলা পকীকৰণ আৰু সংবর্ধনৰ নিবিদা জি ডি চি এলক অর্পণ কৰা হৈছিল৷ এছিয়ান ডেভেলপমেণ্ট বেংকৰ প্রায় ৩০০ কোটি টকা ব্যয় সাপেক্ষে নির্মাণ কৰিবলগীয়া এই নলাৰ কাম–কাজক লৈ লৈও সন্দেহ প্রকাশ কৰিছে স্থানীয় ৰাইজে৷ এই পেকেজৰ অধীনত ডিব্রুগড় চহৰৰ প্রায় ১৫টা গুৰুত্বপূর্ণ নলা–নর্দমা নির্মাণৰ দায়িত্ব উক্ত প্রতিষ্ঠানটোক অর্পণ কৰা হৈছে৷
ডিব্রুগড়ৰ জেইল ৰোড নলা, ৰেডক্রছ ৰোড, সেউজপুৰৰ নলা, পদুমনগৰ, জীৱন ফুকন নগৰ, মিলননগৰ, মাইজান আৰু আউনীআটী শাখা সত্রৰ সমীপৰ এটা নলাৰ কাম উক্ত পুঁজিৰ পৰা কৰা হৈছিল৷ এই নলাসমূহৰ নির্মাণতো বহু বিসংগতি ৰৈ যোৱাৰ অভিযোগ উত্থাপন হৈছে৷ চহৰখনৰ মানকটা পথৰ কাষৰ নলা, মিলননগৰৰ প্রধান পথটোক সামৰি এফ গলি হৈ নগাবাৰী পর্যন্ত জালানবাগানৰ নলাত পৰালৈকে বহুসংখ্যক নলা–নর্দমাৰ পানী ওলোৱাৰ সুব্যৱস্থা কৰা নহ’ল৷ বিভিন্ন স্থানত নলা–নর্দমাসমূহ অর্ধনির্মিত হৈ থকাৰ বাবে এজাক বৰষুণ দিলেই কৃত্রিম বানত বুৰ যায় সমগ্র চহৰখন৷ ঠিকাদাৰী প্রতিষ্ঠানসমূহে লকডাউনৰ দোহাই দি উক্ত কামসমূহ সম্পূর্ণ নোহোৱা বুলি প্রকাশ কৰা কার্যই চহৰবাসীক এতিয়া অধিক শংকিত কৰি তুলিছে৷
এই ধৰণে কাম আৰম্ভ আগবাঢ়িলে আগন্তুক ৬ মাহৰ ভিতৰতো এই আধৰুৱা কামসমূহ সম্পূর্ণ হোৱাৰ কোনো সম্ভাৱনা নাই৷ প্রধানতঃ উক্ত ঠিকাদাৰী প্রতিষ্ঠানসমূহৰ গাফিলতিতে কার্যতঃ স্তব্ধ হৈ পৰিছে ডিব্রুগড় চহৰৰ নলা নির্মাণৰ কাম৷ যাৰ বাবে দুর্ভোগ ভুগিবলগীয়া হৈছে ডিব্রুগড়বাসীয়ে৷ উল্লেখ্য যে বিগত দিনকেইটাতকৈ আজি চহৰখনৰ বান পৰিস্থিতি সামান্য উন্নত হৈছে৷ তৎসত্ত্বেও ডিব্রুগড়ৰ অধিকাংশ স্থানেই এতিয়াও কৃত্রিম বানত বুৰ গৈ আছে৷