🔹 থিতাতে প্ৰাণহানি ১১ বছৰীয়া কিশোৰৰ
নিয়মীয়া বাৰ্তা, ১৭ আগষ্ট : জোনাইৰ জোনকাৰেংস্থিত ৫১৫ নং ৰাষ্ট্ৰীয় ঘাইপথত বুধবাৰে সন্ধিয়া ৬.৩০ বজাত সংঘটিত হয় এক শোকাৱহ পথ দুৰ্ঘটনা। এই পথ দুৰ্ঘটনাত থিতাতে নিহত হৈছে এজন ১১ বছৰীয়া কিশোৰ। জানিব পৰা মতে, অৰুণাচল প্ৰদেশৰ ইটানগৰৰ পৰা পাচিঘাট অভিমুখে গৈ থকা AR-02B-5002 নম্বৰৰ এখন চাৰিচকীয়া বাহনৰ খুন্দাত থিতাতে নিহত হয় কিশোৰটি। মৃত কিশোৰগৰাকী জোনাইৰ মধ্য বিজয়পুৰ গাঁৱৰ বুলি জানিব পৰা গৈছে। ঘটনাস্থলীত স্থানীয় ৰাইজে উপস্থিত হৈ দুৰ্ঘটনা সংঘটিত কৰা বাহনখনৰ সৈতে চালকজনক কৰায়ত্ত কৰি জোনাই আৰক্ষীক চমজাই দিয়ে। দুৰ্ঘটনা সংঘটিত হোৱা বাহনখনৰ সৈতে চালকজনক সোধা-পোছাৰ বাবে জোনাই আৰক্ষী থানাত ৰখা হৈছে বুলি জানিব পৰা গৈছে।
প্ৰেৰক কৰবী দলে