নিয়মীয়া বাৰ্তা, ২৪ ছেপ্টেম্বৰঃ ৰে’ল আৰু বস্ত্রশিল্প দপ্তৰৰ কেন্দ্রীয় ৰাজ্যিক মন্ত্রী দর্শনা জাৰদোশে আজি মুখ্যমন্ত্রী ড০ হিমন্ত বিশ্ব শর্মাক তেওঁৰ চৰকাৰী বাসভৱনত সাক্ষাৎ কৰে৷ এই সাক্ষাতৰ সময়তে ৰাজ্যখনত ৰে’ল বিভাগে ৰূপায়ণ কৰি থকা বিভিন্ন প্রকল্প সন্দর্ভত আলোচনা কৰা হয়৷
এই আলোচনা কালতেই দ্বীপৰ বিল এলেকাত ৰে’ল দুর্ঘটনাৰ ফলত হাতীৰ মৃত্যু হোৱা ঘটনাত উদ্বিগ্ণতা প্রকাশ কৰি ড০ শর্মাই এই অংশটোত হাতীৰ মুক্ত অহা–যোৱাৰ বাবে এক এলিভেটেড কৰিড’ৰ নির্মাণ কৰিবলৈ আহ্বান জনায়৷
বৰাক উপত্যকাৰ মাজেৰে নতুন দিল্লী আৰু আগৰতলাৰ মাজত চলাচল কৰা ৰাজধানী এক্সপ্রেছৰ চলাচলৰ মাত্রা বৃদ্ধি কৰিবলৈও মুখ্যমন্ত্রীগৰাকীয়ে আহ্বান জনায়৷ তদুপৰি গুৱাহাটীত ইণ্ডিয়ান ইনষ্টিটিউট অৱ ফেশ্বন টেকন’লজীৰ এটা প্রতিষ্ঠান স্থাপন কৰাৰ বাবেও জাৰদোশক ড০ শর্মাই আহ্বান জনায়৷
অসমৰ শিপিনীয়ে উৎপাদন কৰা সামগ্রীয়ে যাতে বিশ্বৰ বজাৰ দখল কৰিব পাৰে, তাৰ বাবে উন্নত প্রযুক্তিৰ দিশত বস্ত্রশিল্প খণ্ডলৈ সহযোগিতা আগবঢ়াবলৈও মুখ্যমন্ত্রীয়ে আহ্বান জনায়৷