কাল কৰোনাই প্ৰাণ ললে জনপ্ৰিয় কণ্ঠ শিল্পী ভিটালী দাসৰ

নিয়মীয়া বাৰ্তা ২১ এপ্ৰিলঃ   ক’ভিড-19 আক্ৰান্ত হৈ মৃত্যুক সাৱটি ললে শিল্পী ভিটালী দাসে।
যোৱা ১৪ এপ্ৰিলত লতাশিল বিহু অনুষ্ঠানত ভাগ ল’বলৈ গৈ অসুস্থ হৈ পৰিছিল জনপ্ৰিয় কণ্ঠশিল্পীগৰাকী। কালাপাহাৰৰ ক’ভিড চিকিৎসালয়ত চিকিৎসাধীন হৈ আছিল শিল্পী গৰাকী। ভিতালী দাসক ভেণ্টিলেটৰৰ সহায়ত শ্বাস-প্ৰশ্বাস প্ৰদান কৰি থকা হৈছিল।

শোক প্ৰকাশ মন্ত্ৰী ড০ হিমন্ত বিশ্ব শৰ্মাৰঃ জনপ্ৰিয় কণ্ঠশিল্পী ভিটালী দাসৰ মৃত্যুত শোক প্ৰকাশ কৰে মন্ত্ৰী ড০ হিমন্ত বিশ্ব শৰ্মাই। মন্ত্ৰীগৰাকীয়ে সামাজিক মাধ্যম যোগে জনায় যে অতি দুখেৰে আপোনালোকক অৱগত কৰিব বিচাৰিছো যে জনপ্ৰিয় কণ্ঠশিল্পী শ্ৰী ভিটালী দাসে কোভিড-১৯ত আক্ৰান্ত হৈ আজি সন্ধিয়া শেষ নিশ্বাস ত্যাগ কৰিছে ৷ তেওঁ লগতে মধুমেহ ৰোগতো আক্ৰান্ত হৈ আছিল ৷ তেখেতৰ বিদেহ আত্মাৰ সদগতি কামনা কৰাৰ লগতে শোক সন্তপ্ত পৰিয়াললৈ সমবেদনা জ্ঞাপন কৰিলোঁ ৷

কণ্ঠশিল্পী ভিতালী দাসৰ মৃত্যুত প্ৰদেশ কংগ্ৰেছৰ সভাপতি ৰিপুণ বৰাৰ শোক প্ৰকাশ

কণ্ঠশিল্পী ভিতালী দাসৰ মৃত্যুত গভীৰ শোক প্ৰকাশ কৰিছে অসম প্ৰদেশ কংগ্ৰেছ কমিটীৰ সভাপতি ৰিপুণ বৰাই। সংবাদ মাধ্যমলৈ প্ৰেৰণ কৰা এক বিবৃতিত সভাপতি বৰাই কয় যে কাল কোৰোনাই অকালতে প্ৰাণ কাঢ়ি লোৱা কণ্ঠশিল্পী ভিতালী দাস আছিল ৰাজ্যৰ এগৰাকী জনপ্ৰিয় তথা প্ৰতিশ্ৰুতিসম্পন্ন কণ্ঠশিল্পী। বিশেষকৈ বিহুগীতক অধিক জনপ্ৰিয় কৰা আৰু নতুন প্ৰজন্মৰ মাজলৈ লৈ যোৱাৰ ক্ষেত্ৰত ভিতালী দাসৰ যি অৰিহনা সেয়া অতুলনীয় আৰু অদ্বিতীয়। বিশিষ্ট তথা প্ৰতিষ্ঠিত কণ্ঠশিল্পীগৰাকীৰ অকাল মৃত্যুত ৰাজ্যৰ সাংস্কৃতিক ক্ষেত্ৰখনত যি ক্ষতি হ’ল,যি শূণ্যতাৰ সৃষ্টি হ’ল সেয়া অপূৰণীয়। প্ৰয়াত শিল্পীগৰাকীৰ বিদেহ আত্মাৰ সদগতি কামনা কৰাৰ লগতে তেওঁৰ শোকসন্তপ্ত পৰিয়ালটিক গভীৰ সমবেদনাও জ্ঞাপন কৰে প্ৰদেশ কংগ্ৰেছৰ সভাপতিগৰাকীয়ে।