নিয়মীয়া বাৰ্তা ২৩ মাৰ্চঃ অহা ২৭ মার্চৰ পৰা অসমত তিনিটা পর্যায়ত অনুষ্ঠিত হ’বলগীয়া বিধানসভা নির্বাচন সুকলমে অনুষ্ঠিত কৰাৰ বাবে সাজু হৈছে নির্বাচন আয়োগ৷ প্রথম পর্যায়ৰ ভোটগ্রহণৰ বাবে নির্বাচন আয়োগে ই ভি এম আৰু ভি ভি পেট মেচিনসমূহ নির্দিষ্ট ভোটকেন্দ্রলৈ প্রেৰণৰ বাবে সাজু কৰিছে৷ নির্বাচন আয়োগৰ এটা সূত্রই জনোৱা মতে, ৰাজ্যৰ মুঠ ৩৩,৫৩০টা ভোটকেন্দ্রত ভোটগ্রহণ কৰা হ’ব৷ এই ভোটকেন্দ্রসমূহত প্রথম পর্যায়ত ১,৬৭,৬৫০গৰাকী বিষয়া–কর্মচাৰী নির্বাচনী দায়িত্বত নিয়োজিত হ’ব৷ আনহাতে, ১,৩৫১গৰাকী মহিলা বিষয়াই মহিলাৰ বাবে পৃথক ভোটকেন্দ্র পৰিচালনাৰ দায়িত্বত থাকিব৷ সমাগত নির্বাচনৰ বাবে নির্বাচন আয়োগে বর্তমানলৈকে ২,২০০টা ভোটকেন্দ্র স্পর্শকাতৰ কেন্দ্র হিচাপে চিনাক্ত কৰিছে৷ নির্বাচন আয়োগৰ সূত্রটোৱে জনোৱা মতে স্পর্শকাতৰ ভোটকেন্দ্রসমূহত আৰক্ষী–কেন্দ্রীয় নিৰাপত্তা বাহিনীৰ জোৱানেৰে পর্যাপ্ত নিৰাপত্তা ব্যৱস্থা গঢ়ি তোলা হ’ব৷ ৰাইজে যাতে শংকাবিহীনভাৱে ভোট দিবলৈ ওলাই আহিব পাৰে তাৰ প্রতি লক্ষ্য ৰাখি কেন্দ্রসমূহত কটকটীয়া নিৰাপত্তা ব্যৱস্থা কৰা হ’ব৷
সেইদৰে ভোটকেন্দ্রত ই ভি এম আৰু ভি ভি পেট মেচিনত বিসংগতি হোৱাৰ আশংকা কৰি এই মেচিন অতিৰিক্তভাৱে মজুত কৰি ৰখা হৈছে বুলিও সূত্রটোৱে জানিবলৈ দিয়ে৷ সেই অনুসৰি ২০ শতাংশ ই ভি এম আৰু ৩০ শতাংশ ভি ভি পেট মেচিন অতিৰিক্তভাৱে মজুত কৰি ৰাখিছে নির্বাচন আয়োগে৷ উল্লেখ্য যে এইবাৰ নির্বাচনত মুঠ ২,৩২,৪৪,৪৫৪গৰাকী ভোটাৰে ভোটদান কৰিব৷ ইয়াৰ ভিতৰত সাধাৰণ ভোটাৰৰ সংখ্যা হ’ল ২,৩১,৮৬,৩৬২, বহিঃৰাজ্যত কর্মৰত ভোটাৰৰ সংখ্যা হ’ল ৬২,১৩৪জন আৰু বিদেশত থকা ভোটাৰৰ সংখ্যা হ’ল ১১জন৷ ইফালে, নির্বাচন অনুষ্ঠিত হ’বলগীয়া সমষ্টিসমূহত ভোটগ্রহণ আৰম্ভ হোৱাৰ দিনটোৰ ৭২ ঘণ্টা পূর্বে বাইক ৰেলী কৰাটো নিষিদ্ধ কৰিছে নির্বাচন আয়োগে৷ এইক্ষেত্রত কঠোৰ ব্যৱস্থা গ্রহণ কৰিবলৈ নির্বাচন আয়োগে মুখ্য নির্বাচনী বিষয়াক নির্দেশ দিছে৷ এই নির্দেশ অনুসৰি ভোটগ্রহণ আৰম্ভ হোৱাৰ ৭২ ঘণ্টা পূর্বে কোনো ৰাজনৈতিক দল বা সমর্থকে বাইক ৰেলী উলিয়াব নোৱাৰিব৷