নিয়মীয়া বাৰ্তা, ১৬ ডিচেম্বৰঃ ‘কা’বিৰোধী আন্দোলনৰ নামত প্রতিবাদকাৰীৰ বে–আইনী কার্যকলাপ তথা যিকোনো বিক্ষিপ্ত ঘটনা প্রতিৰোধ কৰিবলৈ সষ্টম হৈ উঠিছে আৰক্ষী বাহিনী ৷ বিশেষকৈ গুৱাহাটী মহানগৰীক ‘হট স্পট’ হিচাপে লৈ অসম আৰক্ষীয়ে কেন্দ্রীয় নিৰাপত্তা বাহিনীৰ সহযোগত সম্ভাব্য যিকোনো পৰিস্থিতি নিয়ন্ত্রণৰ বাবে সষ্টম হৈ আছে ৷
অসম আৰক্ষীৰ এক শীর্ষ সূত্রই জনোৱা মতে, গুৱাহাটী মহানগৰীৰ পৰিস্থিতি নিয়ন্ত্রণৰ বাবে ২০ টা কেন্দ্রীয় সশস্ত্র বাহিনী মোতায়েন কৰা হৈছে ৷ আনহাতে, বে–আইনী প্রতিবাদ মষিমূৰ কৰিবৰ বাবে শনিবাৰে মুম্বাইৰ পৰা বিমানেৰে জৰুৰীভাৱে ২,০০০ ৰেপিড একচন ফ’চ (আৰ এ এফ) গুৱাহাটীলৈ অনা হৈছে ৷
আৰক্ষী সূত্রটোৰ মতে আৰ এ এফ যিকোনো গোষ্ঠীসংঘর্ষ আৰু বে–আইনী প্রতিবাদ নিয়ন্ত্রণৰ বাবে বিশেষভাৱে প্রশিক্ষিত ৷ আৰ এ এফে এনে ধৰণৰ সংঘর্ষ বা প্রতিবাদ ৰোধ কৰিবৰ বাবে মাৰণাস্ত্র কমকৈ ব্যৱহাৰ কৰে ৷ ইয়াৰ পৰিৱর্তে প্রতিবাদকাৰীক নিয়ন্ত্রণ কৰিবৰ বাবে ৰবৰ বুলেট, কন্দুৱা গেছ ব্যৱহাৰ কৰাৰ উপৰি বিভিন্ন ধৰণৰ সঁজুলি ব্যৱহাৰ কৰে ৷