নিয়মীয়া বাৰ্তা, ১৮ ডিচেম্বৰঃ নাগৰিকত্ব সংশোধনী আইনৰ বিৰুদ্ধে হোৱা প্রতিবাদৰ সময়ত হোৱা হিংসাত্মক ঘটনাত তৃতীয় পক্ষ ৰূপে কংগ্রেছ জড়িত থকা বুলি শেহতীয়াকৈ উত্থাপিত অভিযোগক নস্যাৎ কৰিলে বিৰোধী দলপতি দেৱব্রত শইকীয়াই ৷ কংগ্রেছী বিধায়িনী দলৰ নেতাজনে মঙলবাৰে স্পষ্ট কৰি দিয়ে যে আন্দোলনটোক নেতিবাচক ৰূপ দিয়াৰ বাবে চৰকাৰে নিজে এজেণ্ট মেলি দিছিল ৷ অসম বিধানসভাৰ দলীয় কক্ষত এখন সংবাদ মেল আয়োজন কৰি দেৱব্রত শইকীয়াই কয়– কংগ্রেছ দলে হিংসাক কেতিয়াও সমর্থন কৰা নাই আৰু ভৱিষ্যতেও নকৰে ৷ মই ১০ ডিচেম্বৰতে আন্দোলনটোক শান্তিপূর্ণ কৰিবলৈ ৰাইজক আহ্বান জনাইছিলোঁ ৷ গতিকে আন্দোলনত হোৱা হিংসাত্মক ঘটনাৰ বাবে কংগ্রেছক জগৰীয়া কৰাটো সম্পূর্ণ ভিত্তিহীন ৷ হিংসাত্মক আন্দোলন কৰাসকলক চৰকাৰে শাস্তি দিয়ক ৷
শ্রীমন্ত শংকৰদেৱ কলাক্ষেত্রত চলোৱা ধ্বংসকার্যত অভিযুক্ত ১০জনৰ ৯জনেই মুছলমান ৷ কিন্তু এইটোও পাহৰিব নালাগে যে প্রতিবাদৰ সময়ত সুৰক্ষা বাহিনীৰ গুলীত নিহতসকলৰ ভিতৰত এজন মুছলমান, এজন খ্রীষ্টান আৰু এজন চাহ জনজাতিৰ যুৱক আছে ৷ সংবাদ মেলত দলপতিজনে ইয়াকো উল্লেখ কৰে যে ‘কা’ বিৰোধী আন্দোলনত চৰকাৰৰ স্বেচ্ছাচাৰী স্বৰূপটো পদে পদে ওলাই পৰিছে ৷ তেওঁ কয়– কংগ্রেছক বদনাম কৰা আৰু আন্দোলনটো বিপথে পৰিচালিত কৰাৰ বাবে প্রধানমন্ত্রী নৰেন্দ্র মোদী আৰু অমিত শ্বাহৰ পৰিকল্পনা অনুযায়ী বহু কংগ্রেছ কর্মীক বিভিন্ন স্থানত ভুৱা অভিযোগত গ্রেপ্তাৰ কৰা হৈছে ৷ ইপিনে, নাগৰিকত্ব সংশোধনী আইন (কা) বাতিলৰ কাৰণে উচ্চতম ন্যায়ালয়ৰ দ্বাৰস্থ হৈছে কংগ্রেছৰ ১১গৰাকী বিধায়ক ৷ প্রাক্তন মন্ত্রী তথা বিধায়িকা অজন্তা নেওগৰ নেতৃত্বত সোমবাৰে উচ্চতম ন্যায়ালয়ত ‘কা’ৰ বিৰুদ্ধে এখন লেখ আবেদন দাখিল কৰে ৷ মঙলবাৰে এখন সংবাদ মেল আয়োজন কৰি বিধায়িকা অজন্তা নেওগে জানিবলৈ দিয়া মতে, আইনখনে ভাৰতীয় সংবিধান চূড়ান্তভাৱে উলংঘা কৰিছে ৷ গতিকে এই আইনখন কেতিয়া গ্রহণযোগ্য হ’ব নোৱাৰে ৷